डेंगु नियन्त्रण अभियानमा धरान

धरान / धरानमा डेंगु संक्रमणको अवस्था भयावह बन्दा पनि स्थानीय सरकार गम्भीर नभएको भन्दै सर्वसाधारणको गम्भीर गुनासो बढिरहेको समयमा उपमहानगरपालिकाले मंगलबार आकस्मिक वैठक राखी सबै वडामा लार्भा खोजी गरी नष्ट गर्ने अभियान ‘सर्च एण्ड डिस्ट्रोय’ अभियान २० वटै वडामा गरिने निर्णय गरेसँगै बुधबार सबै वडामा वडामा यो अभियान सञ्चालन गरिएको छ ।

वडाका जनप्रतिनिधिहरुले स्थानीय टोल विकास संस्था (टिएलओ) हरुलाई परिचालन गरेर सर्च एण्ड डिष्ट्रोय अभियान शु गरिएको हो । उपमहानगरपालिकाको कार्यपालिका बैठकले निर्णय अनुसार आफ्ना वडामा रहेका जहाँ बढी डेंगुका संक्रमणको जोखिम भएका क्षेत्रमा गएर लार्भा नष्ट गर्ने काम गरिएको धरान उपमहानगर पालिका १६ नं. वडाका वडाध्यक्ष मुरारी भट्टराईले जानकारी दिएका छन् ।

धरान १६ मात्र हैन धरानका २० वटै वडामा यो अभियान एकै साथ गरिएको छ ।

सबै वडाबाट एकै पटक एकै साथमा वडाहरुमा सर्च एण्ड डिष्ट्रोय अभियान गर्न अभियान अन्तर्गत नै नगरपालिकाले सरकारी तथा सामुदायिक विद्यालयहरुलाई पनि विदा दिने निर्णय गरेको थियो ।

धरानमा २ महिनाभन्दा बढी समयदेखि शुरु भएको डेंगुको प्रकोपले ८ जनाको मृत्यु भइसकेको छ । धरान उपमहाननगरपालिका अन्तर्गत स्वास्थ्य महाशाखाले दिएको तथ्यांक अनुसार धरानमा ४ हजार ४ सय १३ जनाको डेंगु टेष्ट गर्दा २ हजार ६ सय ५४ जनामा संक्रमण भएको पाएको छ