_1693980289.gif "#")
पोखरास्थित सेती नदीको खोंचमा आइतबार भयावह हवाई दुर्घटना भएको छ । आइतबार अपराह्न साढे ४ बजेसम्ममा ६८ शव दुर्घटनास्थलबाट निकालिएको बताइएको छ । काठमाडौँबाट पोखराका लागि उडेको यती एयरको एनटीवाई ६९१, नाइन एन–एएनसी विमानमा चालक दलका चार सदस्यसहित ७२ जना सवार थिए । नेपालकै हवाई इतिहासमा यो सबैभन्दा ठूलो आन्तरिक हवाई दुर्घटना भएको छ । २०१२ को वैशाखमा पहिलोपटक सिमरामा भारतको कलिङ्गा एयर दुर्घटना हुँदा दुईजनाको मृत्यु भएको थियो । नेपाल नागरिक उड्डयन प्राधिकरणको ‘एभीएसन सेफ्टी रिपोर्ट’ अनुसार पोखरामा आइतबार भएको दुर्घटना व्यावसायिक आन्तरिक उडानतर्फ ५० औँ दुर्घटना हो ।
सारा देश माघी, मकर सङ्क्रान्ति, येले दोङ, कक्फेक्वा तङ्नाम र कुसङ तङ्वे (नयाँ वर्ष) मा हर्षोल्लासपूर्वक रमाइरहेको बेला पोखराबाट आएको यो दुःखद् समाचार निश्चय नै हृदयविदारक छ । सो दुर्घटनामा ज्यान गुमाएका नागरिकहरूका परिवार र आफन्तजन मात्र होइन, सारा देश शोकमा डुबेको छ । विमानमा सवार ७२ मध्ये ६८ जनाको शव भेटिएको छ भने चारजनाको खोजी कार्य भइरहेको समाचार त्यहाँबाट आएको छ । खोजी र उद्धार कार्यमा सरकारले कुनै कमी गर्नु हुँदैन । यस्तो बेलामा सरकारले आफू शोकाकुल परिवारसँगै रहेको अनुभूति उनीहरूलाई दिलाउनु आवश्यक छ ।
पोखरामा अन्तर्राष्ट्रिय विमानस्थलमा परीक्षण उडान भएको एक महिना पनि नबित्दै भएको यो दुर्घटनाले नेपाली हवाई क्षेत्रमा नकारात्मक प्रभाव पर्ने निश्चित छ । यसले नेपालको पर्यटन क्षेत्रमा पनि नकारात्मक प्रभाव पर्नेछ । त्यसैले यसप्रति गम्भीर हुनु आवश्यक छ । नेपालमा वैदेशिक मुद्रा आर्जनको एउटा प्रमुख क्षेत्र पर्यटनमा नकारात्मक प्रभाव पर्नु पक्कै पनि सुखद् विषय होइन । यसको असर दूरगामी हुनसक्छ ।
नेपालको हवाई यात्रालाई सुरक्षित बनाउनु आवश्यक छ । यसका लागि दुर्घटनाको वास्तविक कारण छिटो पत्ता लगाउनुपर्छ । हुन त सरकारले आइतबार नै पाँच सदस्यीय छानबिन आयोग पनि गठन गरिसकेको छ । आयोगले तत्काल काम थाल्नुपर्छ तर छानबिन गरेर मात्र नेपाली आकाशलाई सुरक्षित बनाउन सकिँदैन । आयोगले प्रस्तुत गर्ने सुझावलाई कार्यान्वयन गर्न सके मात्र नेपाली आकाश सुरक्षित हुनेछ । यसअघि पनि हवाई दुर्घटनाको कारण पत्ता लगाउन थुप्रै छानबिन आयोगहरू गठन भएका छन् तर तिनले प्रस्तुत गरेका सुझावहरूको कार्यान्वयनमा सरोकारवाला पक्षहरू संवेदनशील नबन्दा नेपाली आकाश असुरक्षित भएका छन् । नेपाली हवाई यात्रालाई सुरक्षित बनाउन सरकार र सरोकारवाला पक्षले देखिने गरी प्रभावकारी कदम चाल्न ढिलाइ गर्नु हुन्न । सरकारलाई आग्रह गरेका छन् ।
दुर्घटनामा ज्यान गुमाएका नागरिकहरूप्रति भावपूर्ण श्रद्धाञ्जलि अर्पण गर्दै शोकसन्तप्त परिवारजनप्रति हार्दिक समवेदना व्यक्त गर्दछौँ । आगमी दिनमा यस्ता दुर्घटना रोक्नका लागि गम्भीर र जिम्मेवार बन्न सरोकारवाला सबैलाई हार्दिक आग्रह पनि गर्दछौँ ।
