धरान/ सुनसरीको धरान–८ वीरेन्द्रचोकमा डेराको कोठाबाट ठूलो परिमाणमा लागूऔषध बरामद भएको छ।
लागूऔषध बिक्री वितरण भइरहेको विशेष सूचनाका आधारमा प्रहरीले छापा मार्दा ७२८ थान लागूऔषधसहित एक जना पक्राउ परेका छन्।
मंसिर ५ गते राति करिब १०ः४० बजे इलाका प्रहरी कार्यालय धरानबाट खटिएको प्रहरी टोलीले वीरेन्द्रचोकस्थित विष्णुमाया परियारको घरमा डेरा गरी बस्ने ३२ वर्षीय सुशील परियारको कोठामा खानतलासी गरेको थियो।
खानतलासीका क्रममा उनको साथबाट ट्रामाडोल ३६४ क्याप्सुल र स्पासपेन ३६४ ट्याब्लेट गरी जम्मा ७२८ थान लागूऔषध फेला परेको प्रहरीले जनाएको छ।
बरामद लागूऔषधसहित परियारलाई नियन्त्रणमा लिएर इलाका प्रहरी कार्यालय धरानमा ल्याइएको छ। घटनाबारे थप अनुसन्धान भइरहेको प्रहरीले जनाएको छ।