धरान/ सुनसरीको धरानमा प्रहरीले ४९९ किलो गाँजासहित भारतीय नम्बर प्लेटको स्कार्पियो गाडी बरामद गरेको छ।
प्रहरीले गाँजा ओसारपसारमा प्रयोग भएको गाडीसहित चालकलाई समेत नियन्त्रणमा लिएको छ।
जिल्ला प्रहरी कार्यालय सुनसरीका अनुसार मिति २०८३ मंसिर ५ गते राति करिब ११ः३० बजे धरान–२ भानुचोकमा भेडेटारबाट धरानतर्फ आउँदै गरेको भारतीय नम्बर प्लेट बीआर ११ वाई ३०३९ नम्बरको स्कार्पियो गाडीलाई प्रहरीले शंकास्पद रूपमा रोकेर जाँच गर्न खोजेको थियो।
तर, प्रहरीको संकेत बेवास्ता गर्दै गाडी भागेपछि प्रहरीले पछ्याएको थियो।
प्रहरी टोलीले धरान–८ स्थित सेउती पुलबाट उक्त स्कार्पियो गाडी नियन्त्रणमा लिएर जाँच गर्दा १६ बोरामा राखिएको ४९९ किलो गाँजा फेला परेको हो।
गाँजासहित प्रहरीले स्कार्पियो गाडी र चालक मोरङको विराटनगर महानगरपालिका–१३ झमेली चोक बस्ने ३२ वर्षीय अजय कुमार साहलाई नियन्त्रणमा लिएको छ।