दैलेख/ दैलेखमा एक व्यक्तिले आफ्नै श्रीमती र तीन छोराछोरीमाथि बन्चरो प्रहार गर्दा तीन जनाको मृत्यु भएको छ।
मृत्यु हुनेमा श्रीमती र दुई बालबालिका रहेका छन्। घटनामा अर्का एक छोरा गम्भीर घाइते भएका छन्।
चामुण्डाबिन्द्रासैनी नगरपालिका–३, पानीखोलाका ३८ वर्षीय अम्बर सलामी मगरले शनिबार बिहान घरायसी विवादका क्रममा आफ्नै परिवारका सदस्यहरूमाथि दाउरा काट्ने बन्चरो प्रहार गरेको जिल्ला प्रहरी कार्यालय दैलेखले जनाएको छ।
बन्चरो प्रहारबाट गम्भीर घाइते भएका १२ वर्षीय छोरा तपेन्द्र सलामी मगर र तीन वर्षीया छोरी करिश्मा सलामी मगरको उपचारका क्रममा दुल्लु नगर अस्पतालमा मृत्यु भएको थियो।
त्यस्तै, गम्भीर घाइते भएकी ३५ वर्षीया श्रीमती मनिषा सलामी मगरलाई थप उपचारका लागि सुर्खेतस्थित प्रदेश अस्पताल कालागाउँ लगिएको थियो।
शनिबार दिउँसो २ बजे अस्पताल पुर्याइएकी मनिषाको उपचारकै क्रममा मृत्यु भएको प्रहरीले जनाएको छ।