सुनसरी/ सुनसरीको दुहबीबाट करिब २२ किलो गाँजासहित धरानका एक युवक पक्राउ परेका छन्।
पक्राउ पर्नेमा धरान उपमहानगरपालिका–२० निवासी २१ वर्षीय गौरव राई रहेका छन्।
प्रहरीका अनुसार मिति २०८३ मंसिर ५ गते बिहान १०ः३० बजे दुहबी नगरपालिका–७ भलुवास्थित भित्री सडक खण्डमा उनलाई पक्राउ गरिएको हो।
इलाका प्रहरी कार्यालय दुहबी र अस्थायी प्रहरी चौकी तनमुनाबाट संयुक्त रूपमा खटिएको प्रहरी टोलीले नहर चोकबाट भलुवातर्फ आउँदै गरेको को १–०२–०५३ प ४७२९ नम्बरको मोटरसाइकललाई शंका लागेर चेकजाँच गरेको थियो।
सोही क्रममा मोटरसाइकल चालक राईले बोकेको झोलाभित्र गाँजा २१ किलो ९८० ग्राम लागूऔषध फेला परेको प्रहरीले जनाएको छ।
प्रहरीले उक्त लागूऔषध र मोटरसाइकलसहित राईलाई नियन्त्रणमा लिई इलाका प्रहरी कार्यालय दुहबीमा राखेर थप अनुसन्धान गरिरहेको जनाएको छ।