धरान/धरानमा ठूलो परिमाणमा लागूऔषधसहित पाँच जना पक्राउ परेका छन्।
प्रहरीले धरान–१४ हात्तीसारस्थित एक घरमा छापा मारेर उनीहरूलाई नियन्त्रणमा लिएको हो।
कोशी प्रदेश प्रहरी कार्यालय विराटनगरको पीआईटी टोली र इलाका प्रहरी कार्यालय धरानबाट खटिएको संयुक्त प्रहरी टोलीले शुक्रबार दिउँसो करिब ३ बजे धरान–१४ हात्तीसार पथस्थित राजकुमार डंगोलको घरमा छापा मारेको थियो।
उक्त घरमा डेरा गरी बस्ने पाँच जनाको साथबाट प्रहरीले ब्राउन सुगर १२४ ग्राम ४७ मिलिग्राम बरामद गरेको जनाएको छ। त्यसैगरी, नाइट्राजेपाम ४४५ ट्याब्लेट, स्पास्पेन ६५ ट्याब्लेट र ट्रामोल १५ क्याप्सुलसमेत बरामद भएको छ।
पक्राउ पर्नेमा धरान–१५ गोविन्दमार्गका २५ वर्षीय सौरभ जिमी, धरान–२० का २२ वर्षीय सुगम राई, धरान–१४ का २१ वर्षीय अविजित निरौला, धरान–१३ का २५ वर्षीय आशिष राई र मोरङको लेटाङ नगरपालिका–१ का २६ वर्षीय हरि लिम्बू रहेका छन्।
प्रहरीले उनीहरूलाई आवश्यक अनुसन्धानका लागि इलाका प्रहरी कार्यालय धरानमा राखेको छ। घटनाबारे थप अनुसन्धान भइरहेको प्रहरीले जनाएको छ।