धरानमा १५ मा आगलागी घर पूर्ण रुपमा जलेर नष्ट

धरान / धरान १५ मदन आश्रित चौकको एक घरमा आगलागी भएको छ । मदन आश्रित चौक कोकोनट हाउस छेउमा रहेको सीता धितालको काठले बनेको टिनको छाना भएको दुई तले घरमा आगलागी हुदा घर जलेर पूर्ण रुपमा नष्ट भएको छ भने घरमा रहेका सुनचाँदीका गहना, लत्ताकपडा, दुई वटा बाख्रा लगायतका सरसमान जलेर नष्ट भएको हो ।

विहान खाना पकाउने क्रममा ग्याँस पड्केर आगलागी भएको पीडित सीता धितालकी कान्छी बुहारी कल्पना धितालले बताइन् । धरान उपमहानगरपालिकाको दुई वटा दमकल, जनपथ प्रहरी, नगर प्रहरी र स्थानीय प्रहरीले करिब २ घण्टामा आगो नियन्त्रणमा लिएको पीडित कल्पनाले जानकारी दिइन् । उनँले अगालागीबाट करिब १ करोड बराबरको क्षति भएको बताइन् ।

खाना पकाउने क्रममा ग्यास बाल्ने क्रममा ग्यासबाट ह्वात्तै आगो सल्किएको र त्यसपछि ग्यास पड्एिको पीडित कल्पनाले बताइन । घरमा रहनु भएकी सासु आमा र बालबच्चालाई जोगाउन सकिए पनि घरभित्र रहेका सरसमान निकाल्न नसक्दा सबै जलेर नष्ट भएको उनको भनाई छ ।

आगलागीपश्चात गाउँलेहरुले दमकललाई खबर गरेको भएपनि घर तथा घरभित्र राखिएका सरसमान जोगाउन नसकिएको कल्पनाले बताइन् ।

अहिले आगलागी नियन्त्रणमा आए पनि पीडित परिवारको बस्ने बास समेत छैन । परिवारका तीनै भाई वैदेशिक रोजगारमा रहेको कल्पनाले बताइन । आगलागी पश्चात परिवार विचल्ली भएका छन् । पीडित परिवारले आगलागीबाट करिब १ करोड बराबरको क्षति भएको दाबी गरे पनि प्रहरीले भने यति नै क्षति भयो भनेर अहिले भन्न सकेको छैन । प्रहरीले भने क्षतिको विवरण आउन बाँकी रहेको बताएको छ ।