घर घरमै पुगेर नागरिकता

भोजपुर/  स्थानीय सरकारले प्रशासनसँग सहकार्य गरेर अपांग असहाय तथा फरक क्षमता भएकाहरुका लागि सहयोग पुर्‍याउदै आएको छ ।

प्रशासनले घरमै पुगेर उनीहरुलाई नागरिकता वितरण कार्य शुरु गरेको हो ।

नागरिकता नपाएर दुःख पाएकाहरुलार्ई जिल्ला प्रशासन कार्यालय भोजपुरले घरमै पुगेर सेवा प्रदान गरेको छ ।

पहिलो चरणमा प्रशासन कार्यालय भोजपुरले पूर्वी अरुण गाउँपालिकाका तीन जनालाई प्रमुख जिल्ला अधिकारीसहितको टोलीले घरमै पुगेर नागरिकता वितरण गर्दा उनीहरु हर्षित बनेका छन् ।

पौवादुङमा गाउँपालिका–४ र ६ का अपाग, अशक्त र फरक क्षमता भएका नागरिकलाई घर–घरमै गएर नागरिकता वितरण प्रमुख जिल्ला अधिकारी हरिप्रसाद घिमिरेले जानकारी दिए ।

उनका अनुसार वडा नं. ४ बास्तिमका तेजकुमार राईलाई ०९–०१–८०–०१३७४ नम्बर, सोही वडाका आसमाया राईलाई ०९–०१–८०–०१३७५ र वडा नं. ६ ठूलोदुम्माका अरुणराज राईलाई ०९–०१–८०–०१३७६ नम्बरको नागरिकता गरिएको हो ।

नागरिकता पाएपछि खुशीको सीमा नरहेको तेजकुमार राईले बताए । उनले भने–‘नागरिकता नहुदा कामको अवसरबाट बञ्चित हुनुपरेको थियो, अब भने त्यो समस्या हटेर गएको छ ।’

जिल्ला प्रशासन कार्यालय भोजपुरका प्रमुख घिमिरेले नागरिकता नपाएर क्षमता हुदाहुदा पनि सरकारी सेवाबाट बञ्चित हुनुपरेको समस्या आएपछि घरमै पुगेर नागरिकता प्रदान गरिएको बताए ।

उनले भने ‘नागरिकता नभएकै कारण राज्यबाट पाउने सेवा सुविधाबाट उनीहरु बञ्चित थिए, त्यो अवसरबाट उनीहरुलाई टाढा राख्नु हुदैन भन्ने अभिप्रायले हामीले घरमै पुगेर सेवा प्रदान गरेका हौं ।’