बिराटनगर / कोशी प्रदेश सरकारमा सम्मिलित दुई वटा पार्टीले समर्थन फिर्ता लिए पछि अल्पमतमा परेको मुख्यमन्त्री हिक्मतकुमार कार्कीले विश्वासको मत सम्बन्धी प्रस्ताव पेश गर्ने बारेको सूचना प्रदेशसभा सचिवालयमा दर्ता गराएका छन्।
कोशी प्रदेशसभाका सचिव गोपाल पराजुलीका अनुसार असार १४ गते बस्ने प्रदेश सभाको तेस्रो अधिवेशनको पहिलो बैठकको कार्यसूचीमा मुख्यमन्त्री कार्कीले दर्ता गरेको सूचनाका आधारमा विश्वासको मत लिने प्रस्तावलाई कार्यसूचीमा राखिने छ।
सत्ता साझेदार दलहरू नेकपा माओवादी केन्द्र र जसपाले सरकारलाई दिएको समर्थन फिर्ता लिएपछि मुख्यमन्त्री कार्कीलाई सत्तामा टिकिरहन प्रदेशसभाबाट विश्वासको मत लिनुपर्ने बाध्यता छ। हाल एमालेको सरकारलाई राप्रपाले मात्रै साथ दिएको छ।
सत्तारुढ दलको पक्षमा एमालेका ४० र राप्रपाका ६ गरी ४६ जना सांसद मात्रै छन्। प्रदेशसभामा बहुमतका लागि ४७ जना सांसद आवश्यक पर्दछ। विश्वासको मत लिने प्रक्रिया अघि बढाउने, विश्वासको मत आउने अवस्था भए ठिकै छ नभए मुख्यमन्त्रीले राजीनामा दिने नेकपा एमाले कोशी प्रदेश संसदीय दलका प्रमुख सचेतक रेवतीरमण भण्डारीले बताए।
