भालढुंगा माविलाई सुच्चा राईहरुद्वारा दशवटा पंखा प्रदान

धरान / आफ्नो जातीय उत्थानका लागि गठन भएको सुच्चा राई कल्याणकारी समाजले पछिल्लो समय सामाजिक कार्यलाई समेत निरन्तता दिँदै आएको छ ।

समाजले जातीय उत्थानका लागि मात्र हैन समय समयमा रक्तदान कार्यक्रमको आयोजना गर्ने, शैक्षिक क्षेत्रमा सहयोग गर्ने, लगायतका कामलाई निरन्तता दिँदै आएको छ ।

पछिल्लो समय समाजले धरान उपमहानगरपालिकाको २० नं वडामा रहेको भालढुंगा माध्यामिक विद्यालयमा अध्ययनरत विद्यार्थीहरुलाई पठनपाठनमा सहज होस् भन्ने उद्देश्यले १० थान पंखा दिएको छ ।

गर्मीका कारण पठनपाठनमा समस्या आएको विद्यालय व्यवस्थापन समितिका अध्यक्ष ओमकुमार राईले समाजालाई जानकारी गराएपछि सहयोग स्वरुप विद्यालयलाई १० वटा पंखा प्रदान गरिएको सुच्चा राई कल्याणकारी समाजका उपाध्यक्ष विनोस राईले बताए ।

वितरणमा समाजका केन्द्रीय अध्यक्ष बिनोद कुमार राई, उपाध्यक्ष बिनोश राई जिल्ला उपाध्यक्ष चण्डिप्रसाद राईसँगै सदस्य प्रेम राई शान्ता राई नरादेबी राईको उपस्थिति रहेको थियो ।

समाजले सोही दिन धरान २० विष्णुपादुकको ठूलो खैरेनीमा हावाहुन्डरीले छाना उडाएर समस्यामा परेका परिवारलाई समेत आर्थिक सहयोग गरेको समाजमा अध्यक्ष विनोदकुमार राईले बताए ।