धरान । हरियाली सामुदायिक वनको भवनमा संचालन भएको आइसोलेसन केन्द्रको धरान उपमहानगरपालिकाले निरिक्षण गरेको छ ।
नेपाल पत्रकार महासंघ सुनसरीको सहकार्यमा संचालन रहेको आइसोलेसन केन्द्रको आज धरान उपमहानगरपालिकाका मेयर तिलक राई सहितको टोलिले निरिक्षण गरेको हो ।
कोभिड संक्रमितका लागि २५ वेड क्षमताको आइसोलेसन केन्द्र जेठ १ गते देखि संचालनमा आएको हो । केन्द्रमा ७ जना कोभिड संक्रमित विरामी बसेका छन् । केन्द्रको निरिक्षण गर्दै मेयरले कोरोना संक्रमितहरुको उपचारमा कुनै पनि कमी आउन नदिने बताए । अक्सिजन सहितको केन्द्रमा रहेका बिरामीहरुको स्वास्थ्य अवश्थामा सुधार आइरहेको जनाएको छ । केन्द्रमा कोरोना संक्रमित संचारकर्मीहरुलाई समेत बस्नको लागि व्यवस्था गरिएको छ ।
धरान उपमहानगरपलिकाका मेयर राई सहित नेपाल पत्रकार महासंघ सुनसरीका अध्यक्ष जनकऋषि राई, प्रमुख प्रशासकिय अधिकृत विदुर प्रसाद खनाल, स्वास्थ्य महाशाखा प्रमुख उमेश मेहता लगायतले निरिक्षण गरेका थिए ।
केन्द्रमा दुई जना स्वास्थ्यकर्मी खटाएको छ । खानेकुराको व्यवस्थापन धरान उपमहानगरपालिकाले गरिरहेको छ । आईशोलेसन सेन्टरमा बसेका संक्रमितहरुका लागि खेलकुदका सामाग्रीहरु पनि व्यवस्थापन गरिएको छ ।
