धरान । झापाबाट धरान स्थित वीपी कोइराला स्वास्थ्य विज्ञान प्रतिष्ठान ल्याइएका कोरोना संक्रमित बिरामीलाई रातभरी बाहिर राख्नु प्रतिष्ठानको चरम लापरवाही रहेको सामाजिक विकाश मन्त्री जिवन घिमिरेले बताएका छन् ।
झापाको केचनाकवल गाउँपालिकाबाट ल्याइएका २७ जना कोरोना संक्रमितहरुलाई बेडको अभाव देखाउँदै रातभरी बाहिर राख्नु प्रतिष्ठानको लापरवाही रहेको उनले बताए ।
रातभरी बाहिरै बस्नु परेको भन्दै बिरामीहरुले गुनासो गरे पछि मन्त्री घिमिरे शनिबार बिहानै धरान आएका थिए ।
मन्त्री घिमिरले संक्रमितहरुलाई रातभर बाहिरै राखेर अमानवीय कार्य भएको बताए । साथै उनले वीपी जस्तो प्रतिष्ठित स्वास्थ्य संस्थाबाट लापरवाहीको पराकाष्ठ भएको पनि बताए ।
उनी आउँदा सम्म बिरामीहरुलाई आइसोलेसन कक्ष बाहिरै राखिएको थियो ।
उनी आए लगत्तै बिरामीहरुलाई आइसोलेसन कक्षमा भर्ना गरिएको छ । पुनः यस्ता घटना नदोहोर्याउन उनले प्रतिष्ठानका पदाधिकारीहरुलाई निर्देशन समेत दिएका छन् ।
