धनकुटा/ धनकुटाको भेडेटारमा टेम्पु सडकबाट करिब ६० मिटर तल खस्दा धरानका चालक गम्भीर घाइते भएका छन्। दुर्घटनामा टेम्पुमा सवार अन्य दुई जना पनि घाइते भएका छन्।
मंसिर १ गते दिउँसो करिब १ बजे साँगुरीगढी गाउँपालिका–६ स्थित रिबिके जाने सडक खण्डमा मिस्रा होटलबाट रिबिकेतर्फ जाँदै गरेको टेम्पु अनियन्त्रित भई सडक किनारबाट करिब ६० मिटर तल खसेको हो।
दुर्घटनामा धरान–९ निवासी ६० वर्षीय चालक रनबहादुर राई गम्भीर घाइते भएका छन्। उनको टाउकोमा चोट लागेको प्रहरीले जनाएको छ। उनलाई उद्धार गरी उपचारका लागि धरानस्थित बीपी कोइराला स्वास्थ्य विज्ञान प्रतिष्ठानमा पठाइएको छ।
टेम्पुमा सवार भारतीय नागरिक २१ वर्षीय रनी पासवान र ३१ वर्षीय अबु शर्मा पनि दुर्घटनामा घाइते भएका छन्। उनीहरूको अवस्थाबारे थप विवरण आउन बाँकी छ।
दुर्घटनाको जानकारी प्राप्त हुनासाथ इलाका प्रहरी कार्यालय भेडेटार र ट्राफिक प्रहरीको टोली घटनास्थल पुगेर घाइतेहरूको उद्धार गरेको थियो।
प्रहरीका अनुसार दुर्घटनाको कारण खुल्न सकेको छैन। घटनाबारे थप अनुसन्धान भइरहेको छ।