सुनसरी/ सुनसरीको बराहक्षेत्र नगरपालिका–३ नडाहा चोकबाट प्रहरीले ठूलो परिमाणमा लागूऔषधसहित एक युवकलाई पक्राउ गरेको छ।
बिहीबार दिउँसो ३ः४० बजे कान्छीचोकबाट उदयपुरतर्फ जाँदै गरेको प्रदेश ३–०२–००३ प २५९३ नम्बरको मोटरसाइकललाई शंका लागेर रोक्न खोज्दा चालक मोटरसाइकल छाडेर फरार भएका थिए।
मोटरसाइकलको पछाडि सवार बराहक्षेत्रकै ३० वर्षीय अनुश मगरलाई प्रहरीले खानतलासी गर्दा डाइसाइक्लोमिन (Dicyclomine) १ हजार ३ सय ९० ट्याब्लेट र ट्रामाडोल (Tramadol) १ हजार ३ सय ९० क्याप्सुल फेला परेको प्रहरीले जनाएको छ।
इलाका प्रहरी कार्यालय महेन्द्रनगर र अस्थायी प्रहरी चौकी नडाहाबाट संयुक्त रूपमा खटिएको प्रहरी टोलीले लागूऔषध र मोटरसाइकलसहित मगरलाई नियन्त्रणमा लिएको हो।
पक्राउ परेका मगरलाई इलाका प्रहरी कार्यालय महेन्द्रनगरमा राखेर थप अनुसन्धान भइरहेको छ। फरार मोटरसाइकल चालकको पहिचान तथा खोजी भइरहेको प्रहरीले जनाएको छ।
