दमक/ झापाको दमकमा भारतीय नक्कली नोटसहित दुई जना भारतीय नागरिक पक्राउ परेका छन्।
बुधबार साँझ करिब ५ बजे दमक नगरपालिका–६ स्थित देवकोटा चोकमा इलाका प्रहरी कार्यालय दमकबाट खटिएको टोलीले शंकास्पद अवस्थामा भारतीय नम्बरको मोटरसाइकलमा सवार दुई जनालाई नियन्त्रणमा लिएको हो।
पक्राउ पर्नेमा भारतको किसनगन्ज जिल्ला, खनियाबाद–३ फतेपुरका २५ वर्षीय अब्दुल माजिद र २६ वर्षीय रुवेद आलम रहेका छन्।
प्रहरीले उनीहरूको शरीर तथा साथमा रहेको सामान खानतलासी गर्दा माजिदको साथबाट भारतीय ५०० रुपैयाँ दरका ७० थान नोट फेला पारेको थियो।
बरामद नोटको नम्बरमध्ये अधिकांश दोहोरिएको पाइएपछि प्रहरीले नक्कली नोटको आशंकामा परीक्षणका लागि नेपाल राष्ट्र बैंक, विराटनगर पठाएको थियो।
परीक्षणपछि बरामद भएका सबै ७० थान भारतीय नोट नक्कली रहेको पुष्टि भएको प्रहरीले जनाएको छ।
नक्कली नोटसहित पक्राउ परेका दुवै जनालाई मुद्रा सम्बन्धी कसुरमा जिल्ला अदालत झापामा पेश गरिएकोमा अदालतबाट ५ दिनको म्याद लिएर थप अनुसन्धान भइरहेको प्रहरीले जनाएको छ।
