धरान/ धरानतर्फ आउँदै गरेको यात्रुवाहक बसमा प्रहरीले तालिमप्राप्त कुकुरसहित चेकजाँच गर्दा १९० पिस नाइट्राजेपाम ट्याब्लेट बरामद गरेको छ।
प्रहरीले लागूऔषधसहित दुई युवालाई नियन्त्रणमा लिएको छ।
सुनसरीको इटहरी उपमहानगरपालिका–२० तरहरा पानीपिया जंगलस्थित कोशी लोकमार्गमा बिहीबार साँझ संयुक्त प्रहरी टोलीले बस चेकजाँच गरेको थियो।
प्रहरी चौकी तरहरा, ट्राफिक प्रहरी पोष्ट तरहरा र कोशी प्रदेश प्रहरी कार्यालय धरानको केनाइन शाखाबाट खटिएको टोलीले इटहरीबाट धरानतर्फ आउँदै गरेको यात्रुवाहक बसमा चेकजाँच गरेको हो।
चेकजाँचका क्रममा हरिनगरा गाउँपालिका–२ का १८ वर्षीय एइसन मन्सुरी र दुहबी नगरपालिका–२ का २० वर्षीय मोहमद दिलकशको साथबाट नाइट्राजेपाम ट्याब्लेट १९० पिस फेला परेको प्रहरीले जनाएको छ।
लागूऔषधसहित पक्राउ परेका दुवै जनालाई इलाका प्रहरी कार्यालय इटहरीमा ल्याएर थप अनुसन्धान भइरहेको प्रहरीले जनाएको छ।
यसैबीच, सुनसरीको देवानगञ्ज गाउँपालिकामा पनि प्रहरीले ब्राउन सुगरसहित एक जनालाई नियन्त्रणमा लिएको छ।
देवानगञ्ज–३ पाँचौ सिमरमा भारतबाट नेपालतर्फ आउँदै गरेको को.२५ प ७८९७ नम्बरको मोटरसाइकल चेकजाँच गर्ने क्रममा देवानगञ्ज–१ का सन्दिप कुमार मेहताको साथबाट ०.२१ ग्राम ब्राउन सुगर फेला परेको प्रहरीले जनाएको छ।
मेहतालाई उक्त पदार्थ र मोटरसाइकलसहित नियन्त्रणमा लिएर जिल्ला प्रहरी कार्यालय सुनसरीमा ल्याइएको छ। घटनाबारे थप अनुसन्धान भइरहेको प्रहरीले जनाएको छ।
