धरान/ धरान–१५ स्थित हिबिस्कस इङ्लिस बोर्डिङ स्कुलले मैत्रीपूर्ण फुट्सल प्रतियोगितामा विजयी अभिभावक टोलीलाई बुधबार सम्मान गरेको छ।
विद्यालय परिसरमा आयोजित कार्यक्रममा प्रबन्ध निर्देशक गङ्गाराम राई र भाइस प्रिन्सिपल विजय सिंह थेबेले विजेता अभिभावकहरूलाई खादा, मेडल तथा प्रमाणपत्र प्रदान गर्दै सम्मान गरे।
गत असार १३ गते धरान–५ देउरालीस्थित डिडी फुट्सलमा महिला शिक्षक र महिला अभिभावकबीच सम्पन्न मैत्रीपूर्ण प्रतियोगितामा अभिभावक टोलीले शिक्षक टोलीलाई ५–० गोल अन्तरले पराजित गर्दै उपाधि जितेको थियो।
कार्यक्रममा प्रबन्ध निर्देशक राईले शिक्षक र अभिभावकबीचको सम्बन्ध अझ सुदृढ बनाउने, आपसी सहकार्य अभिवृद्धि गर्ने तथा शारीरिक तन्दुरुस्तीप्रति प्रेरित गर्ने उद्देश्यले प्रतियोगिता आयोजना गरिएको बताए।
सम्मानित अभिभावकहरूले पनि यस्ता कार्यक्रमले शिक्षकसँगको आत्मीयता बढाउनुका साथै विद्यालय र अभिभावकबीचको सम्बन्ध अझ मजबुत बनाउने विश्वास व्यक्त गरे।
