काठमाण्डौं/ सार्वजनिक यातायात क्षेत्र सुधारका लागि यातायात व्यवसायी महासंघ तथा यातायात मजदुर सम्बध संगठनहरुले संयुक्त समन्वय समिति गठन गरेको छ ।
यातायात सम्बध ऐन, कानुनहरु संशोधन र आवश्यक परे सडक संघर्षसम्म जाने तयारी समितिको रहेको छ ।
मंगलबार नेपाल यातायात व्यवसायी राष्ट्रिय महासंघको कार्यालयमा सम्पन्न संयुक्त बैठकले महासंघको अध्यक्ष पूण्यप्रसाद सिटौला (सरोज), नेपाल यातायात स्वतन्त्र मजदुर संगठनका अध्यक्ष भीमज्वाला राई, नेपाल यातायात मजदुर संघका अध्यक्ष धर्मराज भण्डारी, अखिल नेपाल यातायात मजदुर संघका अध्यक्ष दीपक केसी, महासंघका महासचिव डेकनाथ गौतम रहेको सार्वजनिक यातायात क्षेत्र सुधारका लागि संयुक्त समन्वय समिति गठन गरेको हो ।
समितिको सल्लाहकारमा महासंघका निवर्तमान अध्यक्ष विजय स्वाँर हुनुहुन्छ भने समितिको बैठकमा प्रत्येक मजदुर संघ संगठनहरुबाट महासचिव वा अध्यक्ष एकजना सहभागी रहने छ ।
समितिले नीतिगत रुपमा हाल सरकारले विधेयक मार्फत जारी गर्न लागिरहेको सवारी तथा यातायात ऐन २०८३ मा ल्याउन लागिरहेको ५ सय देखि १ लाखसम्मको जरिवाना, सडक दुर्घटनामा ज्यान मरेमा चालकलाई हुने सजाय, चालक अनुमतिपत्र निलम्बन र खारेजी सम्बन्धी व्यवस्था लगायतलाई संशोधनका लागि सरकारसंग संयुक्त रुपमा सुझाव पेश गर्ने, यातायात क्षेत्रमा काम गर्ने सबै रुमिकहरुलाई सामाजिक सुरक्षा कोषको दायरामा ल्याउने, यातायात नीतिमा सुझाव, सडक सुरक्षा परिषद् ऐनमा सुझाव, बिमा सम्बन्धी व्यवस्थामा सुझाव दिने बैठकमा सहभागी मजदुर नेता भीमज्वाला राईले बताउनुभयो ।
त्यसैगरी यातायात श्रमिकहरुलाई सडक सुरक्षा सचेतना, यात्रुमैत्री व्यवहार बारे अभियान सञ्चालन गरिने र यातायात व्यवसायीहरुलाई आफ्ना सेवालाई प्रविधिमैत्री बनाउन समेत संयुक्त अभियान सञ्चालन गरिने महासंघका अध्यक्ष पूण्यप्रसार सिटौलाले बताउनु भयो ।
त्यस्तै यात्रु तानातान, व्यवसायी मजदुरका वोली व्यवहारलाई नियमन गर्दै सेवालाई सुधारका लागि संयुक्त कार्यालय स्थापना गरेर जनताको सेवालाई गुनस्तरिय बनाउन संयुक्त अभियानहरु सञ्चालन गरिने मजदुर नेता धर्मराज भण्डारीले बताउनु भयो ।
हामीले लामो समयदेखि सहकार्य गर्दै आइरहेकाछौं महासंघको महाधिवेशन पछि नयाँ नेतृत्व आएकाले हामी बीचको सहकार्यलाई थप बलियो बनाउने र राज्यका अराजकता विरुद्ध सशक्त रुपमा संयुक्त संघर्ष गरिने मजदुर नेता दीपक केसीले बताउनुभयो ।
