धरान/सुनसरीको धरान १६ मा अवस्थित युएन नवोदय +२ कलेजले कक्षा ११ विज्ञान संकायका विद्यार्थीहरूका लागि चिकित्सा शिक्षा सम्बन्धी विशेष अभिमुखीकरण कार्यक्रम आयोजना गरेको छ।
भविष्यमा एमबीबीएस, बीडीएस तथा बी.एस्सी. (नर्सिङ/मेडिकल साइन्स) अध्ययन गर्न चाहने विद्यार्थीलाई लक्षित गर्दै कार्यक्रम सञ्चालन गरिएको हो।
कार्यक्रममा कलेजका +२ विज्ञान संकायका एड्भाइजर तथा बीपी कोइराला स्वास्थ्य विज्ञान प्रतिष्ठानका डा. आर्यन राज श्रवण मण्डल र उहाँको विज्ञ टोलीले चिकित्सा शिक्षाको वर्तमान अवस्था, प्रवेश परीक्षा तयारीका प्रभावकारी उपाय तथा यस क्षेत्रमा रहेका अवसरबारे विद्यार्थीलाई विस्तृत जानकारी गराएका थिए।
कलेजका प्रिन्सिपल डम्बर कुमार तुम्बापोले नियमित अध्ययनसँगै विद्यार्थीलाई करियरमुखी तथा व्यावहारिक ज्ञान प्रदान गर्ने उद्देश्यले यस्ता कार्यक्रम सञ्चालन गरिएको बताउनुभयो।
उहाँले प्लस टु अध्ययनकै क्रममा चिकित्सा शिक्षाबारे स्पष्ट मार्गदर्शन पाए विद्यार्थीलाई उच्च शिक्षामा प्रवेश, छात्रवृत्ति तथा प्रतिस्पर्धात्मक परीक्षामा सफलता हासिल गर्न सहज हुने विश्वास व्यक्त गर्नुभयो।
कलेजका जनसम्पर्क अधिकृत रामबहादुर लिम्बुले विद्यार्थीलाई केवल प्लस टु उत्तीर्ण गराउनु मात्र नभई उनीहरूको भविष्यको लक्ष्य पहिचान गराई त्यसअनुसार तयारी गराउने कलेजको मुख्य उद्देश्य रहेको बताउनुभयो।
उहाँका अनुसार यस्ता अभिमुखीकरण कार्यक्रमले विद्यार्थीलाई उच्च शिक्षाको प्रतिस्पर्धामा आत्मविश्वासका साथ अघि बढ्न सहयोग पुर्याउनेछ।
कार्यक्रममा सहभागी कक्षा ११ का विज्ञान संकायका विद्यार्थीहरूले अभिमुखीकरण अत्यन्त उपयोगी, प्रेरणादायी र भविष्यको शैक्षिक यात्राका लागि मार्गदर्शक बनेको प्रतिक्रिया दिएका छन्।
कलेजले आगामी दिनमा पनि विद्यार्थीको करियर विकास केन्द्रित यस्ता कार्यक्रमलाई निरन्तरता दिने जनाएको छ।
