_1693980289.gif "#")
-साङ्केतिक तस्बिर
झापा/ झापामा शुक्रबार साँझ तीन फरक घटनाले सनसनी मच्चाएको छ। एकातिर सडक छेउमा अज्ञात पुरुषको शव फेला परेको छ भने दुर्घटनामा घाइते भएका एक पैदलयात्रीको उपचारकै क्रममा मृत्यु भएको छ। अर्कोतर्फ पुरानो रिसइबीका कारण दाउ प्रहारबाट एक युवक गम्भीर घाइते भएका छन्।
राजमार्गबाट तल अज्ञात पुरुषको शव फेला
मेचीनगर नगरपालिका–८ जोरसिमलस्थित महेन्द्र राजमार्गबाट करिब ५० मिटर तल अन्दाजी ३५–४० वर्षका एक पुरुष मृत अवस्थामा फेला परेका छन्। स्थानीयले शव देखेपछि प्रहरीलाई खबर गरेका थिए। इलाका प्रहरी कार्यालय काँकडभिट्टाबाट खटिएको टोलीले कानुनी प्रक्रिया पूरा गरी शव पोस्टमार्टमका लागि प्रादेशिक मेची अस्पताल भद्रपुर पठाएको छ। मृतकको पहिचान खुल्न बाँकी रहेको प्रहरीले जनाएको छ।
मोटरसाइकलको ठक्करपछि उपचाररत तामाङको मृत्यु
जेठ ११ गते मेचीनगर–१२ सयरडाँगी चोकमा मोटरसाइकलको ठक्करबाट गम्भीर घाइते भएका ४४ वर्षीय निमा तामाङको उपचारकै क्रममा मृत्यु भएको छ। आर्थिक अभावका कारण अस्पतालबाट डिस्चार्ज लिएपछि थप उपचारका लागि मेची आम्दा अस्पताल लगिएका तामाङको शुक्रबार निधन भएको प्रहरीले जनाएको छ। दुर्घटनामा संलग्न मोटरसाइकल चालक नारायण भट्टराईलाई प्रहरीले नियन्त्रणमा लिएर अनुसन्धान अघि बढाएको छ।
पुरानो रिसइबीमा दाउ प्रहार, एक गम्भीर
कन्काई नगरपालिका–५ चप्रामारीमा पुरानो रिसइबीका कारण दाउ प्रहार हुँदा ३० वर्षीय सूर्यलाल राजवंशी गम्भीर घाइते भएका छन्। बाटोमा हिँडिरहेका बेला २५ वर्षीय दीपक बिष्टले दाउ प्रहार गरेको प्रहरीको प्रारम्भिक अनुसन्धानबाट खुलेको छ। घटनालगत्तै प्रहरी टोलीले दाउसहित बिष्टलाई नियन्त्रणमा लिएको छ। घाइते राजवंशीको सुरुङ्गास्थित अस्पतालमा प्रारम्भिक उपचारपछि थप उपचारका लागि बी एन्ड सी अस्पताल बिर्तामोड पठाइएको छ।
प्रहरीले तीनै घटनाबारे थप अनुसन्धान जारी रहेको जनाएको छ।
