धरान/ गत भदौमा भएको जेनजी आन्दोलन का क्रममा झुम्का कारागार बाट फरार भएका दुई प्रतिवादीलाई प्रहरीले धरानबाट पक्राउ गरेको छ।
जबरजस्ती करणी मुद्दामा फरार रहेका धरान–१७ का ३७ वर्षीय प्रकाश दमाईलाई वडा प्रहरी कार्यालय धरानको टोलीले गएराति धरान–१७ को पट्नाली क्षेत्रबाट पक्राउ गरेको हो।
सुनसरी जिल्ला अदालत को २०७९ पुस ५ गतेको फैसला अनुसार उनलाई १० वर्ष कैद, दुई लाख रुपैयाँ जरिवाना, एक लाख रुपैयाँ पीडित क्षतिपूर्ति तथा १२ हजार रुपैयाँ पीडित राहत कोष रकम तोकिएको थियो।
यस्तै, ज्यान मार्ने मुद्दामा फरार रहेका धरान–१५ का २९ वर्षीय ‘दाँते’ भनिने गणेश राईलाई पनि प्रहरीले पक्राउ गरेको छ।
अदालतको २०७८ पुस २३ गतेको फैसला अनुसार उनलाई ६ महिना कैद र पाँच हजार रुपैयाँ जरिवाना सजाय सुनाइएको थियो।
जिल्ला प्रहरी कार्यालय सुनसरीका अनुसार दुवै प्रतिवादीलाई थप कानुनी प्रक्रियाका लागि सम्बन्धित निकायमा बुझाइएको छ।
