_1693980289.gif "#")
सुनसरी/बुढासुब्बा गोल्डकपको २६औं संस्करणमा पहिलोपटक सहभागिता जनाएको लालीगुँरास एसोसियसन पोखरालाई पराजित गर्दै नव आगन्तुक 'प्लानिङ बोइज युनाइटेड' फाइनलमा प्रवेश गरेको छ ।
२-१ गोल अन्तरको जित निकालेको प्लानिङका लागि खेलको दोस्रो हाफको १३औं मिनेट र ४१औं मिनेटमा क्रमशः विलियम एलेक्स र म्यान अफ द म्याच प्रतापसिंह राईले योगदान गरे ।
पहिलो पटक प्रतियोगितामा सहभागी दुवै टिमले मैदानमा भएको असमझदारीका कारण तीतो अनुभव गर्न पुगे ।
पहिलो हाफ मध्यतिर दुई टिमबीच भएको घम्साघम्सीपछि प्लानिङ बोइजका पापा इबोउ केबी र लालीगुराँस पोखराका इस्कन्दर सिद्दिकी जुनो रेड कार्ड पाउँदै मैदान बाहिरिए । लालीगुराँसका म्यानेजर ईश्वर बस्यालसमेतलाई रेफ्रीले मैदान बाहिर पठाइदिए ।
खेलको दोस्रो हाफपछि लयमा फर्किएको प्लानिङ बोइजका तर्फबाट दोस्रो हाफकै १३ औं मिनेटमा डिबक्सभित्र फउल पाएपछि प्राप्त पेनाल्टीलाई विलियम एलेक्सले गोलमा परिणत गरे ।
खेलको ४१ औं मिनेटमा एलेक्सको असिस्टमा म्यान अफ द म्याच प्रतापसिंह राईले वन भर्सेज वनको मुभमा किपरलाई बिट गर्दै प्लानिङका लागि निर्णायक गोल गरे ।
घम्साघम्सीपछि रेड कार्ड पाएर बाहिरिएका लालीगुँरास पोखराका तर्फबाट जर्सी नं. ४४ लगाएर मैदानमा उत्रिएका इस्कन्दर सिद्दिकी जुनोले पहिलो हाफको छैटौं मिनेटमा गरेको गोल टिमका लागि सान्त्वना बन्यो ।
क्वाटरफाइनलमा न्युरोड टिम (एनआरटी)लाई पराजित गर्दै सेमिफाइनल पुगेको प्लानिङ बोइजले भोलि बुधबार हुने दोस्रो सेमिफाइनल खेलको विजेतासँग भिडन्त गर्नेछ ।
आयोजक धरानविरुद्ध जित निकालेको लालीगुँरास एसोसियसन घर फर्किएको छ । बुधबार दोस्रो सेमिफाइनल खेल झापा-११ र चर्च बोइजबीच हुने आयोजकले जनाएको छ ।
पाहुना टोली रोयल थिम्पु भुटानलाई क्वार्टर फाइनलमा पराजित गर्दै झापा-११ सेमिफाइनलमा प्रवेश गरेको हो भने चर्च बोइज विभागीय टोली नेपाल पुलिस क्लबलाई पराजित गर्दै सेमिफाइनल प्रवेश गरेको हो ।
धरान-१६ स्थित धरान रंगशालामा बुधबार दिउँसो ३ बजेदेखि यी दुवै टिमले फाइनल प्रवेशका लागि प्रतिस्पर्धा गर्ने छन् ।
