_1693980289.gif "#")
धरान/ धरान उप–महानगरपालिकामा ट्राफिक चेकजाँचका क्रममा ठूलो परिमाणको लागू औषध गाँजा बरामद भएको छ।
मिति २०८२ साल माघ ७ गते दिउँसो १ बजेर २० मिनेट जाँदा जिल्ला ट्राफिक प्रहरी कार्यालय धरान, सुनसरीबाट खटिएको टोलीले धरान–२ स्थित चिनियाँचोकमा चेकजाँच गरिरहेको थियो।
सोही क्रममा रत्नारोडबाट पुरानो बजारतर्फ आउँदै गरेको प्र.१–०२–०४६ प ८९९१ नम्बरको मोटरसाइकल रोक्न खोज्दा चालकले मोटरसाइकल छाडेर फरार भएको प्रहरीले जनाएको छ।
मोटरसाइकलको पछाडि सवार धनकुटा जिल्लाको चौबिसे गाउँपालिका–७ निवासी ३३ वर्षीया मनमाया लिम्बुले बोकेको कालो झोलाबाट ९ किलो ३ सय ग्राम गाँजा लागू औषध फेला परेको थियो।
लागू औषध तथा मोटरसाइकलसहित लिम्बुलाई नियन्त्रणमा लिई इलाका प्रहरी कार्यालय धरानमा ल्याएर थप अनुसन्धान भइरहेको प्रहरीले जनाएको छ।
साथै, फरार मोटरसाइकल चालकको खोजतलास कार्यसमेत तीव्र रूपमा अघि बढाइएको छ।
प्रहरीले लागू औषध ओसारपसारविरुद्ध कडाइका साथ निगरानी बढाइएको र यस्ता गतिविधिमा संलग्नलाई कुनै हालतमा नछोडिने जनाएको छ।
