धरान/ युनाइटेड डान्स एकेडेमीको आयोजनामा सञ्चालन भएको धरान २०८२ सिजन ९ को फाइनल प्रतियोगिता सफलतापूर्वक सम्पन्न भएको छ।
कला तपाईंको मञ्च हाम्रो भन्ने मूल नाराका साथ आयोजना गरिएको उक्त नृत्य प्रतियोगिताले स्थानीय तहका प्रतिभावानहरूलाई आफ्नो क्षमता प्रस्तुत गर्ने अवसर प्रदान गरेको थियो।
पुष १४ गते सोमबार सम्पन्न प्रतियोगिता धरान-८ स्थित सभागृहमा भएको थियो।
प्रतियोगितामा धरानका १० वटा विद्यालयबाट १० जना प्रतिस्पर्धीहरू सहभागी भएका थिए। प्रतियोगितामा युनिशा राई विजेता घोषित भएकी छन् भने युनिशा राई प्रभात स्कूलकी विद्यार्थी हुन्।
त्यसैगरी द्वितीय लिबर्टी रेसिडेन्सियल स्कूलकी टिका मगर , तृतीय विष्णु मेमोरियल सेकेन्डरी स्कूलकी इशा राई र सान्त्वना होलील्यान्ड स्कूलका हिमाल तामाङले स्थान हासिल गर्न सफल भएका छन्।
विजेता युनिशा राईले नगद १ लाख रुपैयाँ प्राप्त गरेकी छन्।भने द्वितीय हुने टिका मगरले ५० हजार रुपैयाँ, तृतीय हुने इशा राईले २५ हजार रुपैयाँ र सान्त्वना स्थान हासिल गर्ने हिमाल तामाङले ५ हजार रुपैयाँ नगद पुरस्कार प्राप्त गरेका छन्। साथै, विजेता स्थान हासिल गर्ने सबै प्रतिस्पर्धीहरूले नटराज ट्रफी समेत प्राप्त गरेका छन्।
कार्यक्रमका प्रमुख अतिथिका रूपमा धरान उपमहानगरपालिकाका उपमेयर आइन्द्र विक्रम बेघाको उपस्थिति रहेको थियो। कार्यक्रममा बोल्दै आयोजक पक्षले यस्ता प्रतियोगिताले विद्यार्थीहरूमा कला, अनुशासन र आत्मविश्वास विकास गर्न महत्वपूर्ण भूमिका खेल्ने विश्वास व्यक्त गरेका थिए ।
