-फाईल तस्बिर
सर्लाही/ मानवीय सेवा गर्ने उद्देश्यले प्रयोग गरिने रेडक्रसको एम्बुलेन्समै ठूलो परिमाणको गाँजा फेला परेको छ।
हरिवन नगरपालिका–५, घुर्कौलीस्थित हिरालाल टोलमा ज १ च १५५८ नम्बरको एम्बुलेन्समा लागुऔषध लुकाइ–छिपाइ गरी ढुवानी भइरहेको भन्ने गोप्य सूचनाको आधारमा प्रहरीले पछ्याउँदै नियन्त्रणमा लिएको हो।
नेपाल रेडक्रस सोसाइटी रामनगर बहुअर्वाको नाममा दर्ता गरिएको सो एम्बुलेन्सलाई इलाका प्रहरी कार्यालय हरिवनबाट खटिएको प्रहरी टोलीले जाँच गर्दा पछाडिको भागमा बोराभित्र लुकाइएको ५१ किलो ५०० ग्राम गाँजा फेला परेको प्रहरीले जनाएको छ।
प्रहरीका अनुसार पक्राउ परेका व्यक्ति एम्बुलेन्स चालक सुरेन्द्र राय यादव रौतहट यमुनामाई – ४ सरुअठाका ३७ वर्षीय हुन्।
बरामद गरिएको गाँजा, एम्बुलेन्स र चालकलाई इलाका प्रहरी कार्यालय हरिवनमा राखेर थप अनुसन्धान अघि बढाइएको जिल्ला प्रहरी कार्यालय सर्लाहीले जानकारी दिएको छ।
