-सांगेतिक तस्बिर
सुनसरी/ धरान उपमहानगरपालिका–११ मा मङ्गलवार मध्यराति एक किशोरमाथि धारिलो हतियार प्रहार भएको छ।
राति करिब १ः३० बजे घर बाहिर निस्किएका लाक्पा राईका १५ वर्षीय छोरा आकाश राईमाथि तीन जनाको समूहले अचानक आक्रमण गरेको प्रहरीले जनाएको छ। हतियार प्रहारबाट आकाश गम्भीर घाइते भएका छन्।
उनको बायाँ कुममा गहिरो चोट लागेको र तत्कालै धरान–१८ स्थित बीपी कोइराला स्वास्थ्य विज्ञान प्रतिष्ठान, घोपामा भर्ना गरिएको प्रहरीले जानकारी दिएको छ।
आक्रमणमा संलग्न तीनै जनाको पहिचान खुलेको छैन। घटनापछि फरार उनीहरूको खोजी कार्य इलाका प्रहरी कार्यालय धरानले तीव्र बनाएको छ।
प्रहरीले घटना के कारणले भएको हो भन्नेबारे अनुसन्धान पनि अघि बढाएको जनाएको छ।
