_1693980289.gif "#")
धरान/ धरानमा जेन-जी युनाइटेड अभियानले शनिबार विशाल कोणसभा सम्पन्न गरेको छ।
धरानको भानुचोकमा ठूलो संख्यामा भेला भएका सहभागीहरूले छाता चौक, चतरालाईन, कल्याण चौक हुँदै पुतली लाइनमार्ग समेटिएको शान्तिपूर्ण र आकर्षक र्याली निकालेका छन्।
कार्यक्रमलाई चेतनामूलक र सांस्कृतिक रूपमा समृद्ध बनाउन जेन-जी कलाकारहरूले देशभक्ति गीत, नृत्य र नाटक प्रस्तुत गर्दै जनचेतना र राष्ट्रप्रेमको भावनालाई झनै प्रबल बनाए।
विभिन्न स्थानमा छरिएका जेनजी युवालाई एकताबद्ध गर्न आयोजित कोणसभामा अधिकांश वक्ताहरूको एउटै सन्देश थियो— “जेनजीहरू एक बनौँ, राष्ट्र बनाऔँ, लक्ष्यलाई यथार्थमा बदलौँ।”
जेनजी आन्दोलनको बलिदान र घाइतेहरूको पीडालाई संस्थागत रूपमा सम्बोधन नहुँदा ‘राष्ट्रिय परिवर्तन पार्टी’ स्थापना गरिएको कार्यक्रमका प्रमुख वक्ता तथा बिर्तामोडको जेनजी आन्दोलनमा दाहिने खुट्टा गुमाएका राजेश पोर्तेलले बताए। २१ सदस्यीय केन्द्रीय समिति रहेको पार्टी दर्ता भइसकेको र निर्वाचन चिन्ह ‘बाँसुरी’ तय भएको उनले जानकारी गराए।
पोर्तेलले अन्तरिम सरकारले जेनजी आन्दोलनको बलिदानलाई बेवास्ता गरिरहेकाले भविष्यमा चुनावी माहोल बनेपछि माग झनै ओझेलमा पर्ने आशंकाले पार्टी गठन गरेको भन्दै, हिजोका जनआन्दोलनजस्तै बलिदान फेरि खेर नजाओस् भन्ने उद्देश्य स्पष्ट पारे।
उपाध्यक्ष अजयकुमार राईले पनि आन्दोलनका घाइते र सहिद परिवारको आवाज सशक्त रूपमा स्थापित गर्न पार्टी खोल्नु बाध्यता बनेको बताए। “हामी आन्दोलनमा होमिँदा कुनै चुनावको कल्पना थिएन, तर हाम्रो आवाजलाई सुनाइ दिनुपर्ने आवश्यकता देखिएपछि पार्टी गठन गरियो,” उनले भने।
महासचिव अन्जु राई, सचिव सागर तामाङ र कोषाध्यक्ष उषा लक्ष्मी तुम्वाहाङफे रहेको केन्द्रीय समिति कोसी प्रदेशका जेनजी युवाले नेतृत्व गरेको छ।
जेनजी युनाइटेड अभियानको कार्यक्रम शैली पुराना राजनीतिक सभाभन्दा भिन्न देखियो। सभाध्यक्ष, प्रमुख अथिति वा विशेष अतिथि राखिएको थिएन। कार्यक्रम सञ्चालिका अन्जु राईले उद्देश्य स्पष्ट पार्दै कार्यक्रमको प्रवाह सहज बनाइन्। कलाकारहरूको प्रस्तुति, युवा–युवतीको अनुशासन, मञ्चमा पालो पालो सम्हालिएको चारवटा राष्ट्रिय झण्डाले कार्यक्रमलाई झनै प्रभावकारी बनायो।
सभ्य, शान्तिपूर्ण र अनुशासित रूपमा सम्पन्न यो कार्यक्रममा सहभागी युवाले जेनजी आन्दोलनलाई एकताको नयाँ धार र दिशा दिने प्रतिबद्धता व्यक्त गरे।
