_1693980289.gif "#")
इटहरी/कोशी प्रदेशको इटहरी–२ आयुर्वेदिक टोलमा १०८ शिवलिङ्ग स्थापना गरी धार्मिक पर्यटन प्रवर्द्धन गर्ने ऐतिहासिक योजना साकार भएको छ।
त्रिनेत्र अध्यात्म चिन्तन केन्द्रको सङ्कल्प, केन्द्रीय समितिको अभिभावकीय भूमिका र स्थानीय समुदायको सक्रिय सहभागितामा यो भव्य आयोजना सुरु गरिएको हो।
असार शुक्ल पूर्णिमादेखि सुरु भएको श्रीमद्भागवत् चतुर्मास पारायणको समापन अवसरमा आयोजना गरिएको “१०८ शिवलिङ्ग प्राण प्रतिष्ठा तथा आध्यात्मिक–धार्मिक पर्यटन प्रवर्द्धन कार्यक्रम” कात्तिक १४ गतेदेखि २१ गतेसम्म चल्ने भएको छ।
कार्यक्रमको सुरुवात कात्तिक १४ गते भव्य कलश शोभा यात्रासँग हुने छ भने कात्तिक १७ देखि १९ गतेसम्म विशेष प्राण प्रतिष्ठा अनुष्ठान सञ्चालन हुनेछ।
यस अवसरमा नेपालका काठमाडौँ, पोखरा, धरान, बराहक्षेत्र, नवलपरासी लगायतका ठाउँका साथै भारतका दिल्ली, सिक्किम, विहार, सिलगुडीबाट समेत धार्मिक तथा सामाजिक प्रतिनिधिहरूको सहभागिता रहनेछ।
स्थापित शिवलिङ्ग र संरचनाहरू नेपाली पहिचान झल्काउने गरी तयार पारिएका छन्।
भक्तपुरमा बनेका कलात्मक इँटाबाट निर्मित आसनमा नेपालकै शिलाबाट बनाइएको १०८ शिवलिङ्ग र हनुमानको मूर्तिसमेत स्थापना गरिएको छ।
करिब ३६ लाख रुपैयाँको लागतमा निर्माण सम्पन्न यो परियोजनामा स्थानीय बासिन्दा, संघ–संस्था र प्रदेश सरकारको समेत उल्लेखनीय सहयोग रहने अपेक्षा गरिएको छ।
कार्यक्रमका क्रममा धरानको पिण्डेश्वर बाबा धाम, दन्तकाली, बुढासुब्बा, विष्णुपादुका र बराहक्षेत्र धामलगायत प्रमुख धार्मिक स्थलहरूबाट पनि प्रतिनिधित्व हुनेछ।
सोही अवसरमा सामूहिक शंखघोष र जलाभिषेक आराधना समेत आयोजना गरिने बताइएको छ।
त्रिनेत्र अध्यात्म चिन्तन केन्द्रका करिब तीन दर्जन शाखाबाट प्रतिनिधित्व हुने यो आयोजना धार्मिक पर्यटनको नयाँ सम्भावना मानिएको छ।
शिवलिङ्ग स्थापना स्थल नजिकै रहेको “माया घर नेपाल” सडक मानव उद्धार केन्द्रसँग सहकार्य गर्दै भक्तजनले मानवसेवामा सहभागी हुन सक्ने वातावरण पनि मिलाइएको छ।
कोशी प्रदेश सरकारको पर्यटन, वन तथा वातावरण मन्त्रालयको समन्वयमा यस अवसरमा प्रदेशका ८२ सूचीकृत पर्यटन स्थलहरूको प्रचार–प्रसार गरिनेछ।
इटहरीको सुकल्प सामुदायिक भवन, श्री विष्णु पाञ्चायन मन्दिर, धनकुटा–इटहरी सम्पर्क समाज, नेपाल शेर्पा सङ्घलगायत संस्थाहरूको नजिक रहेको यो स्थललाई “नमुना धार्मिक–पर्यटकीय गन्तव्य”**का रूपमा विकास गर्ने लक्ष्य लिइएको छ।
कार्यक्रम आयोजकहरूले इटहरीवासी, धार्मिक संघ–संस्था र सञ्चारकर्मीहरूलाई सहयोगका लागि धन्यवाद ज्ञापन गर्दै “१०८ शिवलिङ्ग प्रतिष्ठा कार्यक्रमले कोशी प्रदेशको धार्मिक पर्यटन विकासमा नयाँ पहिचान दिलाउनेछ” भन्ने विश्वास व्यक्त गरेका छन्।
