नयाँ दिल्ली/ बङ्गालको खाडीमा सक्रिय समुद्री आँधी ‘मोन्था’ थप शक्तिशाली बन्दै गम्भीर चक्रवाती आँधीमा परिणत हुने भारतीय मौसम विभाग (आईएमडी)ले चेतावनी दिएको छ।
आईएमडीका अनुसार यो आँधी मंगलबार साँझ वा राति आन्ध्र प्रदेशको काकीनाडा नजिकै मछलीपट्टनम र कलिंगपट्टनमबीचको तट पार गर्ने सम्भावना छ। त्यतिबेला हावाको वेग ९० देखि १०० किलोमिटर प्रतिघण्टासम्म पुग्ने अनुमान गरिएको छ।
मोन्थाको प्रभावका कारण तमिलनाडुका केही भागमा भारी वर्षा हुने सम्भावना छ भने आन्ध्र प्रदेश र ओडिशाका तटीय क्षेत्रमा समेत सतर्कता अपनाउन आईएमडीले अलर्ट जारी गरेको छ।
विभागले सोमबार जारी गरेको पूर्वानुमानअनुसार अक्टोबर २८ देखि ३० सम्म महाराष्ट्रको विदर्भ क्षेत्रमा पनि मध्यमदेखि भारी वर्षा हुन सक्छ।
सम्भावित जोखिमलाई ध्यानमा राख्दै भारतीय जनता पार्टी (भाजपा) का राष्ट्रिय अध्यक्ष जेपी नड्डाले आन्ध्र प्रदेश, ओडिशा, तमिलनाडु, पुडुचेरी र अण्डमान–निकोबार टापुका पार्टी एकाइहरूलाई राहत तथा उद्धार कार्यका लागि पूर्ण तयारी अवस्थामा रहन निर्देशन दिएका छन्।
