_1693980289.gif "#")
धरान/ कोशी प्रदेशकै चर्चित र प्रतिष्ठित प्रतिभा प्रतियोगिता ‘एसईई आइडल’ सिजन–६ को तयारी धरानमा आजबाट सुरु भएकाे छ ।
‘शिक्षाका लागि संगीत’ भन्ने मूल नाराका साथ २०७५ सालदेखि नियमित रूपमा आयोजना हुँदै आएको यो प्रतियोगिताले प्रदेशभरिका विद्यार्थीको प्रतिभा पहिचानमा उल्लेखनीय भूमिका खेल्दै आएको छ।
फक्ताङलुङ मिडिया हाउस प्रालीद्वारा आयोजना गरिने यो प्रतियोगिता संगीत, नृत्य र वाककलामा रुचि राख्ने एसईई परीक्षार्थीहरूका लागि आकर्षक मञ्चको रूपमा स्थापित हुँदै आएको छ।
मिडिया हाउसका अध्यक्ष डम्बरकुमार तुम्बापोका अनुसार, “यी तीनवटा प्रतियोगितात्मक कार्यक्रमले विद्यार्थीहरूको लुकेको क्षमता उजागर गर्न र आत्मविश्वास बढाउन ठूलो सहयोग पुर्याउने उद्देश्य लिएको छ।”
यस वर्षको ‘वाइवाइ एसईई आइडल सिजन–६’ अन्तर्गत डान्सिङ स्टार सिजन–६ को तयारी समेत भइरहेको छ।
कोशी प्रदेशका सबै १४ जिल्लामा अडिसन सञ्चालन हुने तयारी छ, जसको सुरुवात एसईई परीक्षा सम्पन्न भएपछि हुनेछ।
सहभागी विद्यार्थीहरूले अनलाइन वा प्रत्यक्ष रूपमा एफटिएल अनलाइन टिभी मार्फत निःशुल्क फारम भर्न सक्नेछन्, र कुनै प्रशिक्षण शुल्क पनि नलिइने आयोजकले जनाएको छ।
विजेताका लागि पुरस्कारहरू पनि आकर्षक छन्:
# विजेता : एक लाख नगद, चार लाख बराबरको पूर्ण छात्रवृत्ति सहित प्लस टु पढ्ने अवसर, बारिष्टा तालिममा ९०% छात्रवृत्ति, गिफ्ट ह्याम्पर र मुस्ताङ र सिकिम भ्रमण निःशुल्क।
# फस्ट रनरअप : ३० हजार नगद, १००% छात्रवृत्ति, बारिष्टा तालिममा ८०% छात्रवृत्ति र गिफ्ट ह्याम्पर।
# सेकेन्ड रनरअप : २० हजार नगद, बारिष्टा तालिममा ७०%र १००% छात्रवृत्ति र अन्य गिफ्ट ह्याम्पर।
त्यस्तै, टप १० फाइनलिस्ट सबैलाई पनि प्लस टु अध्ययनमा १०० प्रतिशत छात्रवृत्ति र बारिष्टा तालिममा ५०%प्रदान गरिनेछ। साथै, उत्कृष्ट प्रतिभाहरूलाई विभिन्न सब–टाइटल अवार्ड पनि दिइने कार्यक्रम संयोजक राम लिम्बूले बताए।
डिजिटल अडिसनमार्फत पनि सहभागी हुन सकिनेछ। इच्छुकले आफ्ना भिडियोहरू whatsapp नम्बर 9852056874 वा 9852062192 मा पठाउन सक्ने व्यवस्था गरिएको आयोजकले जनाएको छ।
यसरी, कोशी प्रदेशका विद्यार्थीबीच उत्साह जगाउँदै आएको ‘एसईई आइडल’ यस वर्ष पनि प्रतिभा खोज र सम्मानको ठूलो मञ्च बन्ने अपेक्षा गरिएको छ।
