_1693980289.gif "#")
झापा/लगातार दुई दिनदेखि परेको अविरल वर्षाले देशभर त्रासदीपूर्ण मानवीय क्षति पुर्याएको छ।
अहिलेसम्म ५३ जनाले ज्यान गुमाएका छन् भने सात जना अझै बेपत्ता रहेका छन्।
सबैभन्दा बढी क्षति इलाममा भएको छ, जहाँ मात्र ३७ जनाको मृत्यु भएको छ। जल तथा मौसम विज्ञान विभागका अनुसार इलाम यसपटकको विपत्तिको केन्द्र बनेको हो।
इलामका देउमाई, माईजोगमाई, सूर्योदय, माई र सन्दकपुर क्षेत्रमा एकै परिवारका सदस्यसहित बालबालिका र वृद्ध वृद्धा ज्यान गुमाउनेहरूको संख्या धेरै छ। पहिरोले गाउँका गाउँ उद्ध्वस्त बनाएको छ।
अन्य जिल्लाहरू पनि समान रूपमा प्रभावित भएका छन्।
• झापामा आमा–छोरा बाढीले बगाउँदा मृत्यु भएको छ।
• पाँचथर र मिक्लाजुङमा एकै गाउँका धेरैले ज्यान गुमाएका छन्।
• उदयपुर, खोटाङ, काभ्रे, दोलखा र रौतहटमा पनि बाढी–पहिरोले ठुलो क्षति पुर्याएको छ।
यसैबीच, बारामा २१ वर्षीय युवक टिकटक बनाउने क्रममा बाढीले बगाएर हराएका छन्। रसुवामा एउटै परिवारका चार जना, इलाममा ४८ वर्षीय महेन्द्र लिम्बु र काठमाडौँकी २२ वर्षीया युवतीसहित सात जना अझै बेपत्ता छन्।
सरकार र सुरक्षाकर्मीहरू उद्धार तथा राहतमा परिचालित भए पनि निरन्तर वर्षाले कार्य कठिन बनाइरहेको जनाइएको छ।
