_1693980289.gif "#")
इलाम/निरन्तरको वर्षापछि आएको बाढी र पहिरोले इलाममा ठुलो मानवीय क्षति पुर्याएको छ। जिल्लाका विभिन्न स्थानमा बाढी–पहिरोमा परी हालसम्म १८ जनाको मृत्यु भएको छ भने दर्जनौं बेपत्ता र घाइते भएका छन्।
डम्बरबहादुर तामाङको घरमा खसेको पहिरोले घरभित्र रहेका ६ जनाको घटनास्थलमै मृत्यु भएको प्रहरीले जनाएको छ। त्यस्तै, सुर्योदय नगरपालिका–१ मानेभञ्ज्याङस्थित राजु क्षेत्रीको घरमा खसेको पहिरोमा परेर ४ जनाको मृत्यु भएको छ।
उद्धार गरी उपचारका लागि लैजाँदै गर्दा थप १ जनाको बाटोमै मृत्यु भएको सशस्त्र प्रहरी बलका सूचना अधिकारी शैलेन्द्र थापाले जानकारी दिए।
सन्दकपुर गाउँपालिका–१, छाँगेमा एक जनाको मृत्यु र एक जना घाइते भएका छन् भने सोही गाउँपालिका–३, सुलुबुङमा एक बालिका घरसहित बेपत्ता भएकी छन्।
माइजोगमाई गाउँपालिका–६, प्याङमा एकैघरका ५ जना अझै बेपत्ता रहेको अधिकारीहरुले जनाएका छन्।
माङ्सेबुङ गाउँपालिकामा एक गर्भवती महिला र एक पुरुष गम्भीर घाइते भएका छन्। त्यस्तै, देउमाई नगरपालिका–५ धारेमा १ जनाको, देउमाई–५ धुसुनेमा २ जनाको र फाकफोकथुम गाउँपालिका–३ रातमाटेमा १ जनाको मृत्यु भएको छ।
इलाम नगरपालिका–५ घोसगाउँमा पनि ६ जनाको मृत्यु भएको पुष्टि भएको छ।
प्रहरी र स्थानीय बासिन्दाले उद्धार कार्य जारी राखेका छन् भने विपद् प्रभावित क्षेत्रका बासिन्दालाई उच्च सतर्क रहन आग्रह गरिएको छ।
