काठमाडौं / साउन २१ गते, ब्राजिलबाट दुबईलाई ट्रान्जिट बनाएर काठमाडौं ओर्लिएकी २१ वर्षीया ब्राजिलियन इमिली मकाइले सान्तोष फरेरा त्रिभुवन विमानस्थलमा उत्रिँदै गर्दा उनको यात्रा निकै सामान्य देखिन्थ्यो। तर, लागुऔषध नियन्त्रण ब्युरोका आँखामा उनी पहिल्यै वाचलिस्टमा परिसकेकी थिइन्।
कारणरु हालै ब्राजिलमार्ग हुँदै कोकिन नेपाल भित्र्याउने क्रम बढेको छ। त्यसमा पनि उनको नेपाल बसाई केवल ३ घण्टा मात्र, त्यसपछि भुटान जाने योजना। यस्तो छोटो बसाइँका बाबजुद उनले काठमाडौंको होटल बुक गरेकी थिइन्। यिनै कारणहरूले प्रहरीको शंका थप बलियो बनायो।
विमानस्थलमा उनको लगेज र ह्यान्डक्यारी जाँच्दा केही भेटिएन। तर प्रहरीलाई कथा यत्तिमै सकिएको विश्वास थिएन। महिला प्रहरीमार्फत शरीरको तलासी गर्दा सबै खुल्यो— उनको कालो ब्रा भित्र १० वटा कन्डममा भरिएको झोल भेटियो। परीक्षण गर्दा त्यो झोल कोकिन भएको पत्ता लाग्यो।
ब्युरोका एसएसपी कृष्णप्रसाद कोइरालाका अनुसार बरामद कोकिनको तौल १ किलो ९५० ग्राम छ। झोल सुकेपछि यो सेतो पाउडरमा परिणत हुने प्रकारको कोकिन हो। इमिलीलाई तत्काल नियन्त्रणमा लिइएको छ र थप अनुसन्धान भइरहेको प्रहरीले जनाएको छ।
