_1693980289.gif "#")
सुनसरी/ लागू औषध विरुद्ध चलाइएको अभियानअन्तर्गत सुनसरी जिल्लामा प्रहरीले दुई फरक स्थानबाट ब्राउन सुगरसहित चार जनालाई नियन्त्रणमा लिएको छ। काकडभिट्टाबाट काठमाडौंतर्फ गइरहेको यात्रुबाहक बस तथा इनरुवा बसपार्क क्षेत्रमा गरिएको चेकजाँचका क्रममा उनीहरू पक्राउ परेका हुन्।
प्रहरीका अनुसार, मिति २०८२ साउन १९ गते राति कोशी गाउँपालिका–७ हरिपुरस्थित पूर्व–पश्चिम राजमार्गमा अस्थायी प्रहरी चौकी हरिपुरबाट खटिएको टोलीले काकडभिट्टाबाट काठमाडौं जाँदै गरेको बा.प्र.०३–००१ ख २९९६ नम्बरको यात्रुबाहक बसलाई रोकेर चेकजाँच गर्दा एक यात्रुबाट ठूलो परिमाणमा लागू औषध फेला परेको थियो।
मोरङ केराबारी–८ का २८ वर्षीय बालकुमार पाण्डेले लगाएको हाप पेन्टको गोजीमा लुकाई छिपाई राखिएको अवस्थामा ४४.३९ ग्राम ब्राउन सुगर फेला परेको प्रहरीले जनाएको छ। उनलाई तत्काल नियन्त्रणमा लिइ जिल्ला प्रहरी कार्यालय सुनसरीमा ल्याई थप अनुसन्धान भइरहेको छ।
त्यसैदिन, सुनसरीको इनरुवा नगरपालिका–४ स्थित बसपार्क चोकमा जिल्ला प्रहरी कार्यालय सुनसरी र अस्थायी प्रहरी पोष्ट बसपार्कबाट खटिएको संयुक्त टोलीले विशेष सूचनाका आधारमा लागू औषधसहित तीन जनालाई पक्राउ गरेको हो।
पक्राउ परेकाहरू र बरामद लागू औषधको विवरण
धनकुटा साँगुरगढी–६ का २७ वर्षीय सुरेश राईको साथबाट २.७२ ग्राम ब्राउन सुगर।
सुनसरी रामधुनी–५ का २५ वर्षीय निरज खड्का र इटहरी–१७ का १८ वर्षीय मोहमद मुख्तारमध्ये मोहमदको साथबाट १.३९ ग्राम ब्राउन सुगर फेला परेको थियो।
संबन्धित सबै व्यक्तिहरूलाई नियन्त्रणमा लिई लागू औषधसम्बन्धी मुद्दामा थप अनुसन्धान अगाडि बढाइएको जिल्ला प्रहरी कार्यालय सुनसरीले जानकारी दिएको छ।
