_1693980289.gif "#")
धरान । लागू औषध ओसारपसारमा संलग्न रहेको आरोपमा सुनसरीको धरानबाट दुई जना मोटरसाइकलसहित पक्राउ परेका छन्।
२०८२ साउन १५ गते साँझ ६:५५ बजेको समयमा धरान उपमहानगरपालिका–२० स्थित सिरिसेबास हिले खोला क्षेत्रमा लागू औषध ओसारपसार भइरहेको विशेष सूचनाका आधारमा इलाका प्रहरी कार्यालय धरानबाट खटिएको टोलीले चेकजाँचका क्रममा २४ किलोभन्दा बढी गाँजा बरामद गरेको हो।
पक्राउ पर्नेमा धनकुटा जिल्ला साँगुरीगढी गाउँपालिका–८ जलारा निवासी ३२ वर्षीय बिरेन राई र सोही गाउँपालिका–८ खुडीका ३८ वर्षीय मोहन राई रहेका छन्।
बिरेन राईको को.३८प २६९६ नम्बरको मोटरसाइकलमा १३.११५ केजी (तेह्र किलो एक सय पन्ध्र ग्राम) र मोहन राईको प्र–१–०२–०५२ प ९६५७ नम्बरको मोटरसाइकलमा ११.१०५ केजी (एघार किलो एक सय पाँच ग्राम) लागू औषध गाँजा फेला परेको प्रहरीले जनाएको छ।
दुवैजनालाई लागू औषधसहित नियन्त्रणमा लिइ थप अनुसन्धान भइरहेको इलाका प्रहरी कार्यालय धरानले जानकारी दिएको छ।
