_1693980289.gif "#")
दुहबी/ सुनसरीको दुहबी नगरपालिका–४ मालहट्टीबाट ११६ केजी गाँजा बरामद प्रकरणमा फरार रहेका एक जना अभियुक्त पक्राउ परेका छन्।
गत वैशाख ६ गते दुहबीबाट मोरङको बुढीगंगातर्फ जाँदै गरेको वा ७ च ९२६३ नम्बरको मारुति सुजुकी कारमा लागुऔषध गाँजा रहेको भन्ने गोप्य सूचनाका आधारमा इलाका प्रहरी कार्यालय दुहबीबाट खटिएको प्रहरी टोलीले कारलाई पिछा गरेको थियो। सो क्रममा मालहट्टीस्थित सडकमा कार रोकेर चालक फरार भएका थिए।
प्रहरीले जाँच गर्दा उक्त कारको डिकीभित्र चार वटा जेब्रा झोलामा प्याक गरी राखिएको ११६ केजी गाँजा बरामद भएको थियो।
घटनापछि फरार रहेका चालक मोरङको बुढीगंगा गाउँपालिका–४ का नसरुदिन मियाँ (२८) विरुद्ध सुनसरी जिल्ला अदालतबाट पक्राउ अनुमति जारी गरिएको थियो।
यसै क्रममा, असार ४ गते इलाका प्रहरी कार्यालय दुहबीको टोलीले पुनः गोप्य सूचनाका आधारमा मियाँलाई दुहबी नगरपालिका–४ मालहट्टी क्षेत्रमै लुकीछिपी बसेको अवस्थामा पक्राउ गरेको छ।
पक्राउ परेका मियाँलाई जिल्ला अदालत सुनसरीबाट पहिलो चरणको सात दिनको म्याद थप गरी थप अनुसन्धान भइरहेको प्रहरीले जनाएको छ।
