गायत्री मन्त्रको उत्पत्ति कोशी नदीबाट भएको प्रधानमन्त्री ओलीको दाबी

विराटनगर/  प्रधानमन्त्री केपी शर्मा ओलीले हिन्दू धर्ममा अत्यन्त प्रभावशाली मानिने गायत्री मन्त्रको उत्पत्ति कोशी नदीबाट भएको दाबी गरेका छन्।

बुधबार विराटनगरमा आयोजित कोशी प्रदेश लगानी सम्मेलनलाई सम्बोधन गर्दै प्रधानमन्त्री ओलीले मन्त्रका ऋषि विश्वामित्रले कोशी नदीको किनारमै बसेर गायत्री मन्त्रको रचना गरेको बताए।

“मन्त्रहरूको पनि मन्त्र, महामन्त्र भनिने गायत्री मन्त्र यहीँ कोशी किनारमै रचना गरिएको हो,” प्रधानमन्त्री ओलीले भने, “महर्षि ऋषि विश्वामित्रले यही ठाउँमा बसेर यसको सृजना गर्नुभएको हो।”

गायत्री मन्त्रलाई हिन्दू धर्मावलम्बीहरूले अत्यन्त पवित्र, शक्तिशाली र ध्यानयोग्य मन्त्रका रूपमा प्रयोग गर्ने गर्छन्।

प्रधानमन्त्री ओलीको यो अभिव्यक्तिले कोशी क्षेत्रको धार्मिक, सांस्कृतिक र ऐतिहासिक महत्त्वलाई पनि उजागर गरेको देखिन्छ।