धरान ।जिल्ला विकास समिती सुनसरीका प्रथम निर्वाचित सभापति एवम् काँग्रेस नेता राम बहादुर बस्नेतको मंगलबार अन्त्येष्टि गरिएको छ ।
नेपाली काँग्रेस सुनसरी क्षेत्र नम्बर १ सभापति सुजेन्द्र तामाङका अनुसार साँझ सुनसरी खोलामा अन्त्येष्टि गरिएको हो । यस अघि विहान बस्नेतको पार्थिव शरीरलाई काँग्रेस वरिष्ठ नेता शेखर कोइरालाले श्रद्धाञ्जली अर्पण गरे ।
सुनसरी पार्टी कार्यालय इनरुवामा डाक्टर कोइरालाले पार्टीको झण्डा ओढाएर श्रद्धाञ्जली दिएका थिए भने काँग्रेस नेता विजय कुमार गच्छदार लगायत पार्टीका नेताहरूको उपस्थितिमा श्रद्धाञ्जली सभा आयोजना भएको हो ।
सुनसरी काँग्रेसको दुई कार्यकाल सभापति भएका बस्नेतको ७८ वर्षको उमेरमा निधन भएको हो ।इनरुवा निवासी बस्नेत २०४९ र २०५४ साल सम्म स्थानीय निकाय निर्वाचनमा जिल्ला विकास समिति सभापतिमा निर्वाचित भएका थिए ।
