धरान/ सुनसरीको चतराबाट सशस्त्र प्रहरी बलले गाँजा बोकेको एम्बुलेन्स नियन्त्रणमा लिएको छ ।
वराहक्षेत्र नगरपालिका–१ स्थित चतराबाट को.१च २९३७ नम्बरको एम्बुलेन्स नियन्त्रणमा लिइएको सशस्त्र प्रहरी बलका सह–प्रवक्ता शैलेन्द्र थापाले बताए ।
एम्बुलेन्सबाट २७३ किलो गाँजा सशस्त्र प्रहरीको सुरक्षा बेस चतराले नियन्त्रणमा लिएको छ ।
चतराबाट सूर्यकुण्ड जाने भित्री सडकमा रोकेर राखेको एम्बुलेन्स जाँच गर्दा ९ वटा पोकामा गाँजा भेटिएको थियो ।
गाँजा र एम्बुलेन्स इलाका प्रहरी कार्यालय चक्रघट्टीमा बुझाइएको डीएसपी थापाले जानकारी दिए ।
तस्करीमा संलग्न एमबुलेन्स चालक फरार भएको प्रहरीको भनाइ छ ।
तीन महिनामा प्रहरीले वराहक्षेत्र हुँदै तस्करी भइरहेको अवस्थामा झण्डै एक टन गाँजा बरामद गरेको इलाका प्रहरी कार्यालय चक्रघट्टीका प्रहरी निरीक्षक राम तिम्सिनाले जानकारी दिए ।