धरान/ दशैको अवसर पारेर धरान उपमहानगरपालिका १९ नं. वडा समितिले ज्येष्ठ नागरिकलाई सम्मान गरेको छ ।
धरान १९ हरियाली सामुदायिक भवनमा एक कार्यक्रमको आयोजना गरी जेष्ठ नागरिकलाई सम्मान गरिएको हो ।
वडाले दशैको अवसरमा आफ्नो वडामा रहेका १ सय ५५ जना जेष्ठ नागरिकलाई खादा ओढाएर सम्मान गरेको हो ।
कार्यक्रममा वडा सदस्य झुमादेवी गुरुङले जेष्ठ नागरिक आमाहरुलाई सम्मान गर्न पाउँदा अत्यन्तै खुशी लागेको बताइन् ।
उनले यो सम्मानले जेष्ठ नागरिकको आर्शिवाद सधै रहिरहने बताइन् ।
राज्यले जेष्ठ नागरिकलाई सम्मान गर्ने नीति बनाए पनि धेरै ठाउँमा ज्येष्ठ नागरिकको उचित सम्मान हुन नसकेको समयमा वडा नं. १९ ले जेष्ठ नागरिकलाई भेला गराएर सम्मान गर्न पाएकोमा वडा सचिव भानुभक्त चौहानले गौरव महशुष भएको बताए ।
विगतमा समेत ज्येष्ठ नागरिकलाई हिडडुल गर्न लौरो वितरण गरेको थियो भने वडाबाटै पोसिलो खानेकुरा तथा फलफूल समेत वितरण गरेको थियो ।
कोरोना तथा डेंगु सक्रमणका कारण यो बीचैमा रोकिएको थियो ।
लामो समयपछि यसरी एकै ठाउँमा भेला गराएर ७० बर्ष भन्दा माथिका महिला ज्येष्ठ नागरिकलाई सम्मान गर्न पाएकोमा वडा समितिलाई सौभाग्य मिलेको वडाध्यक्ष पूर्णबहादुर लिम्बुले बताए । सम्मान गरेकोप्रति वडा नं. १९ का जेष्ठ नागरिकले समेत खुशी व्यक्त गरेका थिए ।
