_1693980289.gif "#")
मोरङ / इलामाका युवा प्रेमप्रसाद आचार्यको मृत्युप्रति धेरैले टिका टिप्पणी गरेका छन् । यसै क्रममा विराटनगर महानगरपालिकाका मेयर नागेश कोइरालाले यो घट्नाले राज्यलाई लज्जित बनाएको बताएका छन् ।
उनले भनेका छन्, ‘देश र समाजलाई नै लज्जित बनाउने गरी संसद भवन अगाडि देशभित्रै बसेर केही गरौं भनेर अगाडि बढिरहेको युवाले आगो लगाएर आत्महत्या गर्नु अत्यन्तै दुखदायी घटना हो । यो घटना शब्दमा वर्णन गरेर नसकिने हो भन्ने मलाई लाग्दछ ।’
उनले सो घटनालाई जनतामा राज्यप्रतिको निराशा र आक्रोशको संकेत भएको टिप्पणी समेत गरेका छन् । मेयर कोइरालाले निजी सचिवालयमार्फत आफ्नो भनाइ सार्वजनिक गर्दै आचार्यको आत्मदाह घटनाले राज्यलाई सोच्न बाध्य बनाएको उल्लेख गरेका छन् । ‘आचार्यको आत्मदाह निराशा र आक्रोशको संकेत हो । यो संकेतलाई बुझेर तीनै तहको सरकारले बेलैमा सम्बोधन गरेनौं भने यस्ता घटना अझै बढेर जाने देखिन्छ, । ’
तीनै तहको सरकारले जनतालाई बिना झन्झट र अवरोध सेवा प्रवाह गर्नुपर्नेमा मेयर कोइरालाले जोड दिएका छन् । ऐन कानुन निर्माणदेखि सेवा प्रवाह र जनतालाई कानुनी राज्यको प्रत्याभूति दिलाउने प्रमुख दायित्व संघीय सरकारको भएको उनको भनाइ छ । सीमित स्रोत र साधनको बाबजुद पनि स्थानीय सरकार आफ्नो दायित्व पूरा गर्न सदैव लागिपरिहेको उल्लेख गर्दै उनले विराटनगर महानगरपालिकाले पनि सुशासन, पारदर्शिता र जवाफदेहितालाई पहिलो प्राथमिकतामा राखेर काम गरिरहेको बताएका छन् । मंगलबार शरीरमा पेट्रोल खन्याएर आत्मदाहको प्रयास गरेका आचार्यको उपचारका क्रममा बुधबार बिहान निधन भएको थियो ।
