धरान/ तेस्रो निजगढ राष्ट्रिय तेक्वान्दो प्रतियोगितामा प्रदेश एकले तेस्रो स्थान प्राप्त गरेको छ ।
प्रतियोगितामा दुई स्वर्ण, तीन रजत र दुई कास्य पदकसहित प्रदेश एकले तेस्रो स्थान प्राप्त गरेको टिम म्यानेजर सूर्य दङ्गालले जानकारी दिए । प्रतियोगितामा महिलातर्पm ३३ केजी तौल समूहमा अनिशा राई तथा पुरुषतर्फ ४५ केजी तौल समूहमा सुसन थापाले स्वर्ण पदक प्राप्त गरेका छन् ।
यस्तै, महिलातर्फ ४६ केजी तौल समूहमा आस्मा राई र पुरुषतर्फ ५० केजी तौल समूहमा रोहित राई तथा ५४ केजी तौल समूहमा जगधन राईले रजत पदक प्राप्त गरेका छन् । यसै गरी, पुरुषतर्पm २७ केजी तौल समूहमा सृजन पौडेल र ३३ केजी समूहमा सुसन वनले कास्य पदक प्राप्त गरेको टिम म्यानेजर दङ्गालले बताए ।
प्रतियोगितामा नेपाल प्रहरी टिम छ स्वर्णसहित पहिलो र सशस्त्र प्रहरी बल (एपीएफ) टिम दुई स्वर्ण र चार रजतसहित दोस्रो स्थान प्राप्त गर्न सफल भएका छन् । विजेता खेलाडीहरूलाई मेडल तथा प्रमाणपत्र प्रदान गरिएको छ । प्रतियोगितामा विजेता टिमले पुरस्कार ८१ हजार रुपैयाँसहित ट्रफी हात पारेको छ । यस्तै दोस्रो र तेस्रो टिमले क्रमशः नगद पुरस्कार ४१ हजार र २१ हजार रुपैयाँसहित ट्रफी पाएका छन् ।
निजगढ तेक्वान्दो डोजाङले हरेक वर्ष आयोजना गर्ने प्रतियोगितामा सहभागी हुन प्रदेश एकबाट १३ खेलाडी तथा दुई अफिसियलसहित १५ जनाको टोली गएको थियो । टिम कोचका रूपमा सन्तोष घिमिरे गएका थिए । दुई दिनसम्म चलेको प्रतियोगिता शनिबार सम्पन्न भएको हो ।
