संकटमा पनि उपमहानगरले कसैको साथ नपाएको गुनासो " स्थानीय नेताहरूको आ–आफ्नै अडान"

इटहरी । दोश्रो लहरको कोरोनाका कारण सिंगो मुलुक अस्त ब्यस्त बनिरहेको बेला सुनसरीको इटहरीमा भने उपमहानगरको संयन्त्रलाइ कुनै पक्षबाट सहयोग नमिलेको गुनासो आएको छ ।

नयाँ भेरियन्ट सहितको कोरोना संक्रमणले इटहरी शहर नै आक्रान्त बनेको बेला स्थानीय राजनीतिक दलहरूबाट कुनै प्रकारको सहयोग प्राप्त नभएको भन्दै समन्वयका लागि उपमहानगरले आग्रह गरेको हो ।

उपमहानगरको आयोजनामा भएको जुम मिटिङमा नेपाली कांग्रेसका इटहरी सभापति हेमकर्ण पौडेलले संकटको बेला राजनीतिक दलसँग उपमहानगरका प्रमुख, उपप्रमुख लगायत कुनै संयन्त्रले समन्वय नगरी एक्लौटि ढंगबाट चलेको गुनासो गरे । सहकार्य र समन्वय गरेर अघि बढे नगरवासीको हितमा रात दिन काम गर्न कांग्रेस तयार रहेको सभापति पौडेलले बताए ।

त्यस्तै नेकपा एमालेका इटहरी प्रमुुख याम कुमार सुब्बाले पनि उपमहानगरले तत्काल सर्वपक्षीय बैठक बोलाएर सबै समुहसँग सहकार्य गर्नुपर्नेमा जोड दिए ।

त्यस्तै इटहरी निवासी प्रदेश एक संसद लिलम बस्नेतले उपमहानगरका नगर प्रमुखनै समन्वय गर्न नमानेको बताए । उनले भने, ‘अहिलेको समय म एक्लै गर्छु भन्दा पनि हामि सबै मिलेर संकटको सामना गर्ने हो ।’ नगरवासी बचाउन आफु संसद भएको नाताले जुनसुकै समय र जस्तो सुकै सहयोग गर्न तयार रहेको पनि संसद बस्नेतले बताए ।

नेपाली कांग्रेसका उपसभापति कोविद जंग कार्कीले पनि सबै मिलेर अघि बढेर कोरोनालाइ परास्त गर्नेपर्नेमा जोड दिए ।

सबैको प्रतिक्रिया पाएपछि इटहरी उपमहानगरका प्रमुख द्वारिकलाल चौधरीले चाडै सबै सँग छलफल गरेर मिलेर अघि बढने प्रतिक्रिया दिए ।

यथा शिघ्र बैठक बसेर नगरमा महत्वपुर्ण योजनाहरू ल्याइ इटहरीलाइ कोरोना मुक्त शहर बनाउनेमा आफु कटिवद्ध रहेको नगर प्रमुख चौधरीको भनाइ छ ।