पर्यटन दिवस बेलुन उडाएर मनाइयो

धरान । कोरोनाको कारण प्रभावित बनेको पर्यटन व्यवसायीले पर्यटन प्रवद्र्धनका लागि भए पनि सामान्य रुपमा ४१ औं पर्यटन दिवस मनाएका छन् ।
पर्यटन व्यवसाय तहसनहस भए पनि स्थानीय सरकारले पर्यटन प्रवद्र्धनलाई मुख्य रोजगार र समृद्धिको आधार मानेकाले पर्यटन दिवसलाई स्मरण गर्न पर्यटन व्यवसायीहरुले बेलुन उडाएर मनाएका छन् ।

पर्यटन व्यवसाय अझै धरायसी नै भएका छैनौं, सम्भावना बाकी नै छ भन्ने सन्देश दिनका लागि बेलुन उडाएर भए पनि दिवसको स्मरण गरिएको पर्यटन व्यवसायी बासुदेव बरालले बताए । आइतबार पर्यटन दिवसको अवसरमा धरान उपमहानगरपालिका परिषरमा धरानका प्रमुख तिलक राईले बेलुन उडाएका थिए ।

अघिल्लो वर्षहरुमा पर्यटन दिवसको अवसरमा विभिन्न कार्यक्रमहरु मनाउने गरिएको थियो । तर यस वर्ष कोरोनाको कारण सामान्य रुपमा मनाइएको बरालले बताए । उनले कोरोना संक्रमणले पर्यटन व्यवसाय सबै भन्दा बढी मारमा परेको उनको भनाई छ ।

कार्यक्रममा धरान उपमहानगरपालिकाका प्रमुख राईले कोरोनाको कहरको बिचमा पनि पर्यटन प्रवद्र्धनको खोजि भइरहेको बताए । धरान उपमहानगरमा रहेको पर्यटन विकाश समिती मार्फत थुप्रै गतिविधि भइरहेको जानकारी दिदै राईले निजी क्षेत्रले पनि पर्यटन प्रवद्र्धनमा टेवा पुर्याएको बताए । सरकारले भिजिट २०२० मनाउने योजना बनाए पनि कोरोनाको कारण करोडौंको लगानी तहसनहस भएको उनले बताए ।

उनले पर्यटन दिवसकै पूर्व सन्ध्यामा नेपाल पर्यटन बोर्ड र धरान उपमहानगरपालिकबीच महत्वपूर्ण सम्झौता भएको बताए । अहिलेको अवस्थामा पर्यटन क्षेत्र तहसनहस भए पनि भविष्यमा पर्यटन क्षेत्रको विकासमा धरान उपमहानगरपालिका लागि परेर अगाडि बढ्ने बताए ।