धरान । बुधबार साँझ १७ जना सहित विहिबार बिहान भेटिएका २ जना गरि धरानमा चौबिस घण्टामा १९ जनामा थप कोरोना संक्रमण पुष्टि भएको छ ।
धरानमा बुधवार साँझ ११ जना फुस्रे क्याम्पका नेपाली सेना र ५ जना भारतीय सेना सहित १७ जनामा कोरोना संक्रमण पुष्टि भएको थियो भने विहिरबार दुई जनामा कोरोना संक्रमण पुष्टि भएको धरान उपमहानगरपालिकाको स्वास्थ्य महाशाखाका प्रमुख उमेश मेहेताले बताए । उनका अनुसार बुधबार पुष्टि भएका कोरोना संक्रमितहरुको भदौ १५ गते एन्फा क्वारेनटाइनमा पिसिआर परिक्षण गरिएको थियो । ९३ जनाको पिसिआर परीक्षणमा १७ जनाको रिपोर्ट पोजिटिभ आएको थियो ।
यसै गरी धरान ११ को किसान पथ निवासी एक जना ५७ बर्षीया महिलाको पनि कोरोना पोजेटिभ रिपोर्ट आएको छ । उनको स्वास्थ्यमा सामान्य समस्या देखिएपछि एन्फा क्वारेनटाइनमा गएर उनले स्वाब दिएका थिए ।
विहिबार बिहान आएको रिपोर्ट अनुसार धरान १७ को कन्ट्याक ट्रेसिङ गर्दा धरान १६ की एक ३३ बर्षीया महिलामा संक्रमण पुष्टि भएको छ भने धरान १७ की २२ बर्षीया युवतीमा पनि संक्रमण पुष्टि भएको छ । योसँगै धरानमा कुल संक्रमितको संख्या १ सय ९७ पुगेको पनि मेहताले जानकारी दिए । अहिले सम्म निको भएर घर फर्किने ८५ जना रहेका छन् । त्यस मध्ये ७० जना अस्पतालबाट निको भएका छन् भने १५ जना होम आइसोलेसनमै बसेका निको भएका हुन् ।
