हतियार देखाउँदै आतंक मच्चाउने ३ जना पक्राउ

धरान । धारिलो हतियार देखाउँदै आतंक मच्चाउने धरानका ३ जनालाई इलाका प्रहरी कार्यालय धरानले पक्राउ गरेको छ ।
गत आइतबार साँझ धरान १५ बगरकोट स्थित सेउती खोलाको पुलमा धरान ८ का रोमन विश्वकर्मालाई धारिलो हतियार देखाउँदै कुटपिट भएको थियो ।

कुटपिट गर्नेहरुलाई खोजि गर्ने क्रममा ३ जनालाई पक्राउ गरिएको इप्रका धरानका प्रमुख डिएसपी ज्ञानेन्द्र बस्नेतले बताए । उनका अनुसार पक्राउ पर्नेहरुमा धरान १५ का २९ बर्षीय सुजन राई, १९ बर्षीय सुसन राई र २३ बर्षका मनिष भुजेल रहेका छन् ।

उनीहरुलाई सोमबार साँझ धरान ८ स्थित फलामे पुल नजिक खुकुरी र चक्कु बोकेर सार्वजनिक स्थलमा स्थानीयलाई आतंकित बनाइरहेको अवस्थामा पक्राउ गरेको हो । तीनै जनालाई अभद्र व्यवहार मुद्दामा म्याद थप गरि अनुसन्धान भइरहेको प्रहरीले जनाएको छ ।