धरान । सिमावर्ती क्षेत्रहरुमा अवैध रुपमा तस्कर गर्नेहरु सँग सुरक्षाकर्मीहरुको दैनिक जसो झडप हुने गरेको छ ।
विहिबार राती प्रहरी सँग झडप हुँदा दुई जना तस्कर घाइते भएका थिए । पुनः सुनसरीको सिमावर्ती क्षेत्र हरिनगरमा शुक्रबार राती सशस्त्र प्रहरी र तस्कर बिच झडप भएको छ ।
हरीनगर गाउँपालिकाको वडा नं. ७ घुस्कीमा तस्कर र सशस्त्र प्रहरीबीच झडप हुदा गोली लागि तस्कर समुहका १ जना गम्भिर घाईते भएका छन् ।
हरीनगर गाउँपालिका ७ को घुस्कीमा राति भारतबाट आएका तस्कर समुहले डिउटीमा खटिएका सशस्त्र प्रहरीले बोकेको हतियार खोस्ने क्रममा लोड गरिएको बन्दुक पडकिएको थियो । बन्दुक पड्किदा एक जना तस्करको पेटमा गोली लागेर गम्भिर घाईते भएका छन् । तस्करको पेटमा लागेको गोली पछाडि ढाडबाट निस्किएको छ ।
सशस्त्र प्रहरीको नम्वर ४ गण सुनसरीका प्रमुख एसपी कृष्ण ढकालले दिएको जानकारी अनुसार घाइते हुने हरीनगर ७ घुस्कीका २० बर्षिय सहजद जट (सवाद) अन्सारी रहेका छन् । उनको अहिले बीपी कोइराला स्वास्थ्य विज्ञान प्रतिष्ठानमा उपचार भईरहेको छ ।
हरीनगर ७ घुस्कीको जटवरा भन्ने स्थानमा भएको झडपको क्रममा एक जना सशस्त्र प्रहरी जवान जीवराज विसुन्खे पनि घाईते भएका छन् । उनको टाउकोमा चोट लागेको बताईएको छ ।
