विराटनगर । नेकपाकी अम्बिका थापाले सवारी चालक अनुमति पत्र उदयपुरबाटै दिने व्यवस्था गरिदिन प्रदेश १ सरकारको ध्यानाकर्षण गरेकी छन् ।
प्रदेशसभाको आजको बैठकमा बोल्दै थापाले भनिन्,“यातायात कार्यालय खोलेर केही व्यवस्था राम्रो पनि भएको छ । तर, जब सवारी अनुमती पत्र लिन २ नम्बर प्रदेशमा जानु पर्ने बाध्यता छ । प्रदेशलाई आउने राजश्वसमेत उतै गईरहेको छ ।”
उनले उदयपुरमा जग्गा पनि हेरिएकोले ट्रयाल गर्ने ठाउँको व्यवस्था प्रदेश सरकारले गरिदिनु पर्ने माग गरिन । स्मार्ट लाइसेन्स संघीय सरकारले दिने गरेको र यसलाई प्रदेशमा पनि व्यवस्थित गर्नुपर्ने भन्दै सरकारको ध्यानाकर्षण गरिन ।
नेकपाका सांसद उत्तमकुमार बस्नेत संघले प्रदेशलाई बुझाउने सडक जर्बजस्ती बुझ्ने वा चुपचाप लिने प्रथाको अन्त्य गरिनु पर्ने माग गरे । भने,“आफूले बनाउने हो भने मात्र जिम्मा लिनुपर्छ । सडक प्रदेशलाई भार हुने देखिएको छ ।”
उनले सोलुखुम्बुबाट राष्ट्रिय पुर्ननिर्माण प्राधिकरणबाट लिइएको सडक पूरा हुन नसकेको र प्रदेशलाई बुझाएको भनिए पनि काम नभएको बताए । “पाल्पामा यस्तै सडक पूरा भयो तर यता भएन,”सांसद बस्नेतले भने,“प्रदेशका कतिपय विमानस्थलहरु नखनी राखिएको छ । के भयो विमानस्थल थाहा छैन ।”
उनले मकालुवरुण राष्ट्रिय निकुन्ज सोलुखुम्बु र संखुवासभामा पर्ने तर बजेट जति सबै संखुवासभा जाने गरेको बताए । भने,“रोयल्टी भने सोलुले पाएन । जनताले दुःख पाए तर स्रोतसाधन प्रयोग गर्न पाएनन् ।”
