हल्दिबारी गाउँपालिकाको घटना छानबिन गर्न माग

विराटनगर । प्रदेश १ को प्रदेशसभा बैठकमा सांसदहरुले स्थानीय तहको नीति कार्यक्रममा देखिएको समस्या र सडक निर्माणको ढिलासुस्तीबारे सरकारको ध्यानाकर्षण गरेका छन्।
राप्रपाकी सांसद इन्दिरा राईले असार ७ गते हल्दिबारी गाउँपालिकामा नीति तथा कार्यक्रममा छलफल भईरहँदा अध्यक्ष रविन्द्र लिङ्देनमाथि भएको आक्रमणको निन्दा गर्दै घटनाको छानबिन हुनुनर्पे माग गरेकी छन्।

भनिन,“ व्यापक छलफल भएपछि मात्र माग आउनु पर्छ भन्दाभन्दै अध्यक्षमाथि आक्रमण भएको छ । असार २९ गतेसम्म सभा अन्त्य गर्ने प्रस्ताव गरिएपनि सुनियोजित रुपमा आक्रमण भयो ।” राईले पर्यावरणीय हिसाबले महत्व राख्ने जलथल जंगलको सडकको नामकरणको कुनै अमुक पार्टीको नेताको नाममा राख्न भन्ने बाहनावाजी गरी अध्यक्ष रविन्द्र लिङ्देन र वडाअध्यक्षमाथि आक्रमण भएका बताइन ।

राईले उपाध्यक्षको अध्यक्षतामा नीति तथा कार्यक्रम पास भएको र यो मौजुदा कानुन विपरीत भएको भन्दै प्रदेश सरकारको ध्यानाकर्षण गरेकी छन् । “छलफलपछि मात्र पास गर्नुपर्छ भन्ने तयारीसाथ केही पर मिति सार्दा आक्रमण भएको घटना निन्दनीय छ,” उनले भनिन्,“राजनीतिक संस्कार गलत दिशातर्फ गएको छ । विचारको प्रतिस्पर्धा हुनुपर्छ । व्यक्तिको नाममा सडकको नाम गराइनु किमार्थ ठिक होइन ।”

नेपाली कांग्रेसका सांसद ओमप्रकाश सरागवीले जोगबनी इटहरी जोड्ने ६ लेनको सडक ढिलाईमा सरकारले चासो नदिएको बताउँदै भने,“प्रदेश सरकार निदाएको जस्तो छ । धेरै मानिस आवत जावत गर्ने बाटो निर्माणको काम पूरा गर्न ढिलाइ भएको छ ।” प्रदेश राजधानीलाई जोड्ने सडक निर्माण गर्न ठेक्का लागेको वर्षौ बित्दा पनि सूचारु रुपले काम अघि नबढेको र असारमै धेरै काम गर्ने गरिएको बताए ।
कांग्रेसका सांसद पुरुषलाई पनि एकल पुरुष भत्ता दिने व्यवस्था गर्नुपर्ने बताए । भने,“पुरुषलाई पनि महिलालाई जस्तै भत्ता दिने व्यवस्था गरिनुपर्छ ।” श्रीमतीको मृत्यु भएपछि पुरुष पनि एकल हुने भएकोले उनलाई पनि भत्ताको व्यवस्था हुनुपर्छ ।